Жизнь в районах

 

Алтынньы 27 күнүгэр Саха Өрөспүүбүлүкэтигэр Култуура сылын, «Кэскил» психологическай-медико-социальнай арыаллааһын киинэ тэриллибитэ 30 сылын чэрчитинэн Р.Г.Васильев аатынан улуустааҕы кыраайы үөрэтэр түмэлгэ киин доруобуйаларынан хааччахтаах оҕолорун «Үөрүүнү саҕар айар абылаҥ» быыстапката турда.

Тэрилтэ үбүлүөйдээх сылын тэрээһинигэр киин иитиллээччилэрин, төрөппүттэрин, педагогтарын «Кэскил» дириэктэрэ Елена Габышева, социальнай педагога Аграфена Леонтьева, тьютор Мария Жиркова, түмэл дириэктэрэ Анастасия Федорова эҕэрдэлээтилэр. Түмэлгэ кэлбит дьон икки нэдиэлэ устата киин 13 иитиллээччилэрин: Күннэй Григорьева, Арина Жиркова, Тая Никитина, Настя Павлова, Күннэй Попова, Диана Захарова, Карина Захарова, София Шарина, Аврора Чупрова, Нарыяна Сергеева, Уйгулаана Ильина, Булат Слободчиков, Арсений Артемьев айар дьоҕурдарынан оҥорбут кэрэ көстүүлээх оҥоһуктарын көрүөхтэрэ.

 

Аграфена Леонтьева:

–  Биһиги оҕолорбут аҥардас улууска эрэ буолбакка өрөспүүбүлүкэтээҕи, эригийиэннээҕи уонна бүтүн Арассыыйатааҕы, норуоттар икки ардыларынааҕы таһымнаах куонкурустарга көхтөөхтүк кыттаннар бастакы, иккис, үһүс миэстэлэри ылаллар. Бу быыстапкаҕа саҥа иитиллээччилэрбит, алын кылаас үөрэнээччилэрин үлэлэрэ көрдөрүүгэ турдулар.

Оҕолорбор, төрөппүттэригэр, салайааччыларбар анаан этиэм этэ: оҕолорун тэрээһиннэргэ кытыннардыннар, элбэх ситиһиилээх буоллуннар, өссө үрдүккэ тахсан истиннэр диэн баҕарабын, – диэн санаатын үллэһиннэ.

 

Иван Лукин.