Хорообукка быйылгы элбэх дьиэ кэргэн кинигэ таһаартаран төрүттэрин сөргүттүлэр, чугас дьоннорун үйэтиттилэр.
«Сырдык ыраларбытын салҕыыр саһарҕаларбыт» диэн Сергучевтар дьиэ кэргэн ийэлэрин Анна Федоровна, аҕаларын Степан Ильич туһунан ахтыылардаах, хаартыскалардаах улахан кинигэ таҕыста. Кинигэни сүрүннээн кийииттэр Надежда Николаевна, Ирина Романовна, Ангелина Семёновна салайан оҥордулар. Сиэн кыыстара Дайаана Сергучева, бэтэрээн учуутал, кыраайы үөрэтээччи Антонина Тихонова күүс-көмө буоллулар. Кинигэ техническай эрэдээктэринэн биир дойдулаахпыт Марфа Птицына үлэлэстэ.
Бэлиэ тэрээһиҥҥэ Сергучевтары кытта алтыспыт, чугас дьонноро, доҕотторо, биир дойдулаахтара муһуннулар. Эҕэрдэ тылы нэһилиэк баһылыга Гаврил Бродников эттэ. Кинигэ ис тутулун бибилэтиэкэр Варвара Филиппова ырытан билиһиннэрдэ.
Тэрээһиӈӈэ Степан Ильич үөлээннээхтэрэ, аймахтара Дьокуускайтан Дмитрий Тихонов, Майаттан Иван Романов, Төхтүртэн Мария Неустроева, Татьяна Ларионова, Бэдьимэттэн Валерий Ноев о.д.а. элбэҕи ахтан-санаан аастылар. Элбэх ыалдьыттардаах, төрөппүттэригэр сүгүрүйүү, ытыктабыл киэһэтэ буолан ааста. Оҕолоро, сиэннэрэ ырыаларын ыллаан кэлбит ыалдьыттары сүргэлэрин көтөхтүлэр. Тэрээһини С.И.Сергучев аатынан норуот айымньытын дьиэтин исписэлииһэ Татьяна Тролукова иилээн-саҕалаан ыытта.
Варвара Филиппова, нэһилиэк бибилэтиэкэрэ.
