Бүгүн, алтынньы 23 күнүгэр, Мэлдьэхсигэ биир бэлиэ түгэн, Мэлдьэхситээҕи биэлсэр-акушер пуунугар өр сыл доруобуйа харыстабылыгар үлэлээбит Саха Өрөспүүбүлүкэтин доруобуйатын харыстабылын туйгуна, Мэлдьэхси нэһилиэгин Бочуоттаах олохтооҕо Екатерина Алексеевна Калачева аатын иҥэрии үөрүүлээх күнэ буолла.
Екатерина Алексеевна Калачева 1936 сыллаахха кулун тутар 16 күнүгэр Балыктаах бөһүөлэгэр төрөөбүтэ. Төҥүлү орто оскуолатын бүтэрэн, Дьокуускайга сэллик санаторийыгар үлэлиир. 1959 сыллаахха медучилищеҕа биэлсэр идэтигэр үөрэммит. Баатара Сыырдааҕар биэлсэринэн ананан үлэтин саҕалыыр. Кылгастык Тиэлигигэ үлэлээн баран 1962 сылтан Мэлдьэхситээҕи биэлсэр-акушер пуунугар сэбиэдиссэйинэн ананан 2000 сылга диэри эҥкилэ суох үлэлээбитэ.
Бэлиэ тэрээһиҥҥэ “Мэлдьэхси нэһилиэгэ” тыа сирин түөлбэтин баһылыга Валерий Никифоров, улуус кылаабынай бырааһа Иннокентий Павлов, Саха Өрөспүүбүлэтин үтүөлээх бырааһа, улуустааҕы сэллиги утары охсуһар диспансер фтизиатр бырааһа Евдокия Борисова, Калачевтар аймахтар ааттарыттан Раиса Черкашина уонна төрөппүт уола, Саха Өрөспүүбүлүкэтин муниципальнай сулууспа туйгуна Алексей Тарабукин эҕэрдэ, махтал тылларын эттилэр.
Екатерина Алексеевна Калачева аатын бигэргэтэр биэлсэр-акушерскай пуунун киирии аанын киэргэтэр мемориальнай дуосканы үөрүүлээх быһыыга-майгыга нэһилиэк баһылыга Валерий Никифоров, киин балыыһа кылаабынай бырааһа Иннокентий Павлов уонна РФ, СӨ доруобуйатын харыстыбалын туйгуна, Алтан нэһилиэгин Бочуоттаах олохтооҕо, Мэлдьэхситээҕи биэлсэр-акушер пуунун сэбиэдиссэйэ Ульяна Билюкина арыйдылар.
Үтүө үлэһит дьон үлэлээн-хамсаан ааспыттарын, ааттарын үйэтитии кэнэҕэски ыччаттарга холобур буола туруоҕа.
Мария Григорьева
