Алтынньы 23 күнүгэр Догдоҥоҕо саха балаҕаныгар Арассыыйа ийэлэрин күнүн көрсө култуура киинин тэрийиитинэн олус интэриэһинэй, айар тыыннаах, сэргэх маастар кылаас буолан ааста.
Тэрээһини улуустааҕы оҕо-ыччат спортивнай оскуолатын дириэктэри үөрэх чааһыгар солбуйааччы Айталы Артамонова ыытта. Нэһилиэк олохтоохторугар, ийэлэргэ, оҕолорго анаан гипсэттэн ураты оҥоһуктары оҥоруу сатабылларын көрдөрдө. Бу күн бары биир сомоҕо буолан, уус-уран айар үлэ абылаҥар куустардыбыт. Маастар Айтыына Дмитриевна салалтатынан гипсэ бороһуогун ууну кытта сөптөөх бырыһыанынан анал халыыптарга кутан, араас фигуралары, иһиттэри, киэргэллэри, ким эрэ сахалыы балаҕан, кытыйа, ким эрэ көмүлүөк, шкатулка иһиттэри, Саҥа дьыллааҕы харыйа оонньуурдарын илиибитинэн кутан таһаардыбыт. Хас биирдии кутуллубут гипсэттэн уобарас киһи эрэ сэргии көрөр кэрэ оҥоһуга буолла. Тэрээһиҥҥэ мустубут дьон матырыйаал уратытын кытта билсэн, иэйии кынатыгар уйдаран айар дьоҕурдарын уһугуннардылар. Сэргэх маастар кылаас үрдүк таһымнаахтык ыытылынна. Ийэлэр, оҕолор кыттыыны ылбыттара тэрээһиҥҥэ ураты сылаас, истиҥ эйгэни үөскэттэ. Маастар кылаас кыттыылаахтара айар кут алгыһыгар куустаран, бэйэлэрин оҥоһуктарын үөрүүнэн дьиэлэригэр өйдөбүл гынан илдьэ бардылар.
Билиини-көрүүнү, саҥа сатабыллары тарҕатар, айар-тутар дьоҕурдаах, имигэс илиилээх маастарга Айтыына Дмитриевнаҕа махталбытын тиэрдэбит. Айымньылаах үлэтигэр үрдүк ситиһиилэри баҕарабыт. Өссө да маннык үтүө тэрээһиннэри, айар маастар кылаастары күүтэбит.
Имигэс илиилэр,
Иэйиилээх үлэлэр,
Ийэлэр, оҕолор
Балаҕан иһигэр
Сахалыы тыынынан,
Ураты эйгэнэн,
Билиини-көрүүнү
Дьоҕуру арыйан,
Сүрэххэ иҥэрэн,
Саҥаны салайан,
Санаалыын үрдүккэ
Көҥүллүк көтүөххэ!
Светлана Иванова ‒ Намыына. Догдоҥо.
