Уус-уран гимнастика кыргыттарга олимпийскай успуорт көрүҥэ. Манна спортсменкалар лиэнтэ, скакалка, уобуруччу, мээчик, булава көмөлөрүнэн муусуканан бырагыраама, акробатика элэмиэннэрин толороллор.
Саха Өрөспүүбүлүкэтин уус-уран гимнастикаҕа федерациятын көҕүлээһининэн, алтынньы 23-25 күннэригэр бу көрүҥҥэ биирдиилээн бастыыр иһин Дьокуускай куораттааҕы күрэхтэһии үрдүк таһымнаахтык ыытылынна. Манна араас улуустартан 4-16 саастаах 140-тан тахса оҕо помостка тахсан бастыыр уонна спортивнай разряд ылар иһин бөлөҕүнэн уонна биирдиилээн многоборье дьиссипилиинэлэригэр кииристилэр. Биирдиилээн бастыыр иһин 100, бөлөҕүнэн эрчиллиилэргэ 43 итиэннэ Дьокуускайтан, Нерюнгриттэн, Хаҥалас уонна биһиги улуустарбытыттан 7 кулууп спортсменкалара кытыннылар.
Күрэхтэһии кылаабынай судьуйатынан Татьяна Шишигина, сүрүн сэкирэтээринэн Таисия Макарова үлэлээтилэр.
СӨ уус-уран гимнастикаҕа федерациятын Бэрэсидьиэнэ Людмила Николаева күрэхтэһии кыттыылаахтарын эҕэрдэлээтэ уонна бу күрэхтэһии оҕолор бэйэлэрин кэрэ таһааларын тута сылдьалларыгар, улахан успуорка тахсалларыгар олук буолуоҕа диэтэ.
Мэҥэ Хаҥалас улууһуттан уус-уран гимнастика күрэһигэр биэс оҕо кытынна: Аллараа Бэстээхтэн М.Е.Попов аатынан орто оскуола 2-с кылааһын үөрэнээччилэрэ Моника Романова, Элеонора Егорова, Майаттан В.П.Ларионов аатынан орто оскуола 1-кы кылааһын үөрэнээччитэ Айдина Иванова, Ф.Г.Охлопков аатынан орто оскуола 1-кы кылааһын үөрэнээччилэрэ Алена Шахурдина уонна Айкүн Масаха.
Розалия Шарина тириэньэрдээх улуустааҕы “Күлүм” спортивнай кулууп тэриллэн үлэлээбитэ биир сыл буолла. Бу кылгас кэм иһигэр кулууп чилиэннэрэ утумнаахтык дьарыктанан, кэнсиэрдэргэ, тэрээһиннэргэ ситиһиилээхтик кыттан, бэйэлэрин сүгүрүйээччилэрин сүрэҕин туталлар.
Айдина Иванова бу көрүҥүнэн тартаран дьарыктанар. Дьокуускай куораттааҕы күрэхтэһиигэ кыракый гимнастка 5-с миэстэ буолла. Бу саҥатык саҕалаабыт спортсменкаҕа үрдүк ситиһии буолар.
Успуорт бу кэрэ көрүҥүнэн дьарыктанар кэрэчээн “Күлүмнэр” дьоннорун-сэргэлэрин ситиһиилэринэн үөрдэ, кэрэхсэтэ туралларыгар махталбыт муҥура суох.
Марелла Баишева.
