Майатааҕы Үһүс көлүөнэ оскуолатын иһинэн үлэлиир “Умсулҕан” драматическай устуудьуйа айымньылаахтык үлэлээбитэ быйыл 10 сыла буолла. Бу сыллар тухары “Түмэн” уопсастыбаннай холбоһук бэрэссэдээтэлэ, СӨ култууратын үтүөлээх үлэһитэ Мария Лукина кураатардаан, туруоруллар сценкаларын барытын чочуйан кэллэ.
Алтынньы 30 күнүгэр Р.Г.Васильев аатынан кыраайы үөрэтэр мусуойга үбүлүөйдээх тэрээһини И.М.Сосин аатынан кииннэммит бибилэтиэкэ сүрүннүүр бибилэтиэкэрэ Ирина Молокотина уонна СӨ үөрэҕириитин туйгуна, РФ уопсай үөрэхтээһинин бочуоттаах үлэһитэ, Майа сэлиэнньэтин бочуоттаах олохтооҕо Татьяна Попова үрдүк таһымнаахтык ыыттылар. Үөрүүлээх тэрээһини Майа туһунан олохтоох ааптардар хоһооннорунан видеоролик арыйда. Дьоро күннэринэн үлэ бэтэрээннэрин Майа сэлиэнньэтин баһылыгын социальнай боппуруоска солбуйааччы Наталья Пахомова, улуустааҕы бэтэрээн сүбэтин бэрэссэдээтэлэ Евдокия Решетникова, Үһүс көлүөнэ оскуолатын салайааччыта Людмила Заровняева-Стручкова, нэһилиэнньэ көмүскэллээх буолуутун кэлим киинин салайааччытын солбуйааччы Мария Федорова, үлэлии сылдьыбыт тэрилтэлэрин салайааччылара, о.д.а. эҕэрдэлээтилэр.
Наталья Пахомова “Умсулҕаннар” олохтоох дьаһалтаны кытта биир ситимнээхтик үлэлииллэрин, ыытыллар тэрээһиннэргэ мэлдьи кытталларын, Евдокия Решетникова дойдуга көхтөөх уһун үйэлэнии бырайыак чэрчитинэн элбэх үлэ ыытылларын, уон үһүс сылын үлэлиир Үһүс көлүөнэ оскуола салайааччыта Людмила Заровняева-Стручкова бу сыллар тухары үчүгэй кэлэктииби тэрийэн бүгүҥҥү тэрээһин буола турарын, үлэтэ кэҥээн иһэрин, Людмила Заровняева-Стручкова драмустуудьуйаны төрүттээбит, бөҕө акылааты олохтообут Ираида Васильевна Титова айар куттаах киһи буоларын, бу күҥҥэ диэри ыкса сибээстээхтик үлэлэһэр Мария Дмитриевна Лукинаҕа махтанарын, драмустуудьуйа кыттыылаахтара Бүтүн сойуустааҕы, өрөспүүбүлүкэтээҕи, улуустааҕы куонкурустар кыайыылаахтара, лауреаттара, дипломааннара буолан кэлбиттэрин бэлиэтээн эттилэр.
Людмила Ивановна Махтал суругун уонна сэмэй бэлэҕин бииргэ үлэлэһэр дьонугар Мария Лукинаҕа, Татьяна Поповаҕа уонна драмустуудьуйаны төрүттээбит Ираида Васильевна Титова итиэннэ ол саҕана көхтөөхтүк кыттыбыт Анна Васильевна Сергучева кыргыттарыгар Анна Руслановна Васильеваҕа, Екатерина Михайловна Семеноваҕа туттарда.
“Умсулҕан” драматическай устуудьуйа салайааччыта, Майа сэлиэнньэтин бочуоттаах олохтооҕо, “Мэҥэ аат “бочуот кинигэтигэр аата киллэриллибит, “Майа сэлиэнньэтин социальнай-экэнэмиичэскэй сайдыытыгар кылаатын иһин” бэлиэлээх, социальнай сулууспа туйгуна Марфа Васильевна Алексеева “Улууска култуура уонна ускуустуба сайдыытыгар кылаатын иһин” бэлиэнэн наҕараадаланна. Бу күн “буруйдаахтара” бары салайааччыларыттан итиэннэ сүгүрүйээччилэриттэн эҕэрдэ уонна махтал суруктары, бэлэх-туһах эгэлгэтин туттулар.
Бу күн драмустуудьуйаны төрүттээбит Ираида Васильевна Титова уонна ол саҕана көхтөөхтүк кыттыбыт Анна Васильевна Сергучева кыргыттара ийэлэрин тустарынан ахтан-санаан, уйадыйан ыллылар итиэннэ устуудьуйа үлэтэ салҕанан бара турарыгар махтанан, “Умсулҕаннарга” өйдөбүнньүк бэлэхтэрин туттардылар. Итиннэ сыһыаран эттэххэ, драмустуудьуйа үлэтэ саҕаланыаҕыттан бастакы кыттааччыларынан Марфа Васильевна Алексеева уонна Розалия Константиновна Терентьева буолаллар.
Үбүлүөйдээх тэрээһиҥҥэ төгүрүк саастарын туолбут устуудьуйа чилиэннэригэр Любовь Антоноваҕа, Валентина Аманатоваҕа, Светлана Охлопковаҕа Марфа Васильевна бэйэтин илиитинэн оҥорбут оҥоһуктарынан бэлэхтэрин туттарда. “Умсулҕаннар баҕа санааларбыт куруутун үрдүккэ күөрэйэ көттүннэр диэн соһуччу үөрүү кистэнэ сылдьар өҥнөөх саардары көтүттүлэр.
Ыытааччы Татьяна Петровна бириистээх оонньуулары, сэбиэскэй кэмҥэ сыһыаннаах викториналары ыытта.
Драмустуудьуйа кыттыылаахтара дьиэлэригэр сатабыллаах хаһаайкалар, тапталлаах ийэлэр, эбэлэр, араас тэрээһиннэргэ, кэнсиэрдэргэ, аахсыйаларга көхтөөхтүк кытталлар. Кинилэр бочуоттаах сынньалаҥҥа олордоллор да соло буолбаттар.
Бу күн мусуой саалата тыйаатыр улахан сыанатын санатта. “Умсулҕан” драматическай устуудьуйа уон сыл устата оонньообут сценкаларыттан бастыҥнарын көрөөччүлэригэр анаан толордулар. “Умсулҕаннар” Бүтүн Арассыыйатааҕы “Северная звезда” кылаан бирииһин хаһаайына буолбут Өксөкүлээх Өлөксөй “Саха дьахталларын сэттэ мэтириэтэ” айымньытыттан быһа тардан уобарастары сытыытык уонна чаҕылҕайдык ойуулаан көрдөрдүлэр. Көрөөччү тапталын ылбыт Анна Санникова, Александра Рожина, Римма Варламова, Ольга Аринкина, Лидия Сивцева, Лариса Татаринова, Марфа Алексеева, Зинаида Маркова, Антонина Петрова “Икки ийэ, икки оҕо”, “Баҕа санаа”, “Саҥа табаар”, «Биэнсийэ», “Эмчит” сценкаларын оонньоон, олохпут көрдөөх уонна омсолоох өрүтүн олус бэркэ сырдаттылар. Манна таарыйа сырдаттахха, “Эмчит“ уонна “Баҕа санаа” сыаҥкалар ааптардарынан драмустуудьуйа биир көхтөөх чилиэнэ Татьяна Попова буолар.
Сахабыт сирин саамай кэрэ сибэккитин сардаана туһунан иэйиилээх үҥкүүнү “Сардаана” уһуйаан бэтэрээнэ, иитээччи идэлээх, билигин анал байыаннай дьайыы кыттыылаахтарыгар үлэлиир иис сыаҕын салайааччыта Антонина Петрова бэлэх уунна. Норуот уостан түспэт үйэлээх ырыалара “Аҕам алааһа” Татьяна Попова, “Уральская рябинушка” Зинаида Маркова, Римма Варламова ураты иэйиилээх толорууларыгар көрөөччүлэр куттарын туттулар. Олохтоох муусукаан Андрей Местников байааҥҥа доҕуһуоллаан, кэнсиэри ситэрэн-хоторон биэрдэ.
Улахан экрааҥҥа Бүтүн Арассыыйатааҕы “Друзья в Калининграде” диэн кэтэхтэн ыытыллыбыт куонкуруска 3-с истиэпэннээх лауреат үрдүк аатын ылбыт “Оһуор-ойуу айылҕам” хоһоонунан дьүһүйүү видеота көрдөрүлүннэ. Олохтоох ааптар, СӨ Суруйааччыларын сойууһун чилиэнэ Инна Николаева-Угинка “Умсулҕаннарга” анабыл хоһооннорун тэрээһин ыытааччылара Татьяна Попова уонна Ирина Молокотина кэрэни кэрэхсиир дьонноругар-сэргэлэригэр ааҕан иһитиннэрдилэр.
Түмүккэ Марфа Алексеева салайааччытын дуоһунаһын салгыырыгар анал бэлиэни эдэр солбуйааччытыгар балыыһа бэтэрээнэ Александра Рожинаҕа туттарда.
Дьоро күн кыттыылаахтара үөрүүлээх тэрээһинтэн дуоһуйа сынньанан, астынан, бэйэ-бэйэлэригэр махтанан тарҕастылар.
Марелла Баишева.
