Мэҥэ Хаҥалас улууһун үөрэх үлэһиттэрин ыспартакыйаадата 37-с төгүлүн ыытылынна

 

Алтынньы 29 күнүгэр Арассыыйаҕа Норуоттар сомоҕоһууларын, Мэҥэ Хаҥаласка оскуола иннинээҕи үөрэхтээһин 100 сылларын чэрчитинэн үөрэх үлэһиттэрин улуустааҕы 37-с ыспартакыйаадата ыытылынна.

Улууспут үөрэх эйгэтин үлэһиттэрин успуорт бырааһынныгынан улуустааҕы үөрэх управлениетын начаалынньыгын солбуйааччы, ыспартакыйаада сүрүн судьуйата Михаил Нестеров, үөрэх үлэһиттэрин улуустааҕы идэлээх сойууһун бэрэссэдээтэлэ Иннокентий Скрябин эҕэрдэлээтилэр, наҕараадалары туттардылар.

Күрэхтэһии кыттыылаахтарыгар, тэрийээччилэригэр «Сардаана» оҕону сайыннарар киин иитээччилэрин «Сардаҥа» ансаамбыла «Маҥнайгы хаар» ырыанан эҕэрдэлэрин тиэртилэр.

Павловскайдааҕы, Аллараа Бэстээхтээҕи, Төҥүлүтээҕи, Балыктаахтааҕы, Хорообуттааҕы, Табаҕатааҕы, Наахаратааҕы, Майатааҕы, Харатааҕы методхолбоһуктар уонна үөрэҕирии управлениетын хамаандалара, уопсайа 340 спортсмен, оҕо-ыччат успуорт оскуолатыгар, Ф.Г.Охлопков аатынан Майа орто оскуолатыгар уонна И.Г.Игнатьев аатынан Харатааҕы успуорт оскуолатыгар ыспартакыйаада түһүмэхтэрин аастылар.

Уопсай түмүгүнэн иккис миэстэни Харатааҕы методхолбоһук, үһүс миэстэни Наахаратааҕы методхолбоһук ыллылар. Кыайыыны улуустааҕы үөрэх управлениетын КМО-та: үөрэх управлениетын, Майа сэлиэнньэтин оҕо уһуйааннарын, үөрэтэр-оҥорон таһаарар киин, оҕо-ыччат успуордун оскуолатын холбоһук хамаандата – ситистилэр.

 

Иннокентий Скрябин:

 

– Быйылгы сылга эдэр кыттааччы элбээбитин бэлиэтиэххэ наада. Күрэхтэһии көрүҥнэригэр кэккэ уларыйыылар киирбиттэрэ. Итиэннэ биһиэхэ холобур буолар сылдьар бэтэрээннэрбит кэлэн кыттыыны ыланнар, оруобуна 6 уордьаннаах Хомсомуол төрөөбүт күнүгэр өр бииргэ үлэлээбит биир идэлээхтэрин үөрэ-көтө көрсөн, кэпсэтэн, сэргэхсийэн бардылар.

Кэлэр үөрэх үлэһиттэрин, педагогтарын Илин эҥэр улуустарын холбоһуктаах ыспартакыйаада Таатта улууһугар буолуоҕа. Онно быйылгы күрэхтэһиибит бары көрдөрүүлэрин, ситиһиилэрин түмүгүнэн хас биирдии көрүҥҥэ, түһүмэххэ спортсменнары талар үлэ барыа.

Бүгүҥҥү күн биһиэхэ, үөрэх эйгэтин үлэһиттэригэр олус үчүгэй успуорт бырааһынньыга буолла.

 

Иван Лукин.