Алтынньы 29 күнүгэр Балыктаахха М.П.Габышев аатынан орто оскуолаҕа улахан суолталаах көрсүһүү буолан ааста. Саха Өрөспүүбүлүкэтин Тыа хаһаайыстыбатын миниистирин солбуйааччы Сахаяна Павлова салайааччылаах үлэлиир бөлөх бу дьыл балаҕан ыйыгар өрөспүүбүлүкэҕэ бастакынан Балыктаах орто оскуолатыгар арыллыбыт пиэрмэр кылааһын үлэтин билсээри учууталлары кытта көрсүһүүнү тэрийдилэр.
Бөлөххө Саха Өрөспүүбүлүкэтин Тыа хаһаайыстыбатын министиэристибэтин үлэһиттэрэ Зарема Бочкарева, Елена Владимирова, Анастасия Гермогенова. АГАТУ иһинэн үлэлиир, идэҕэ эбии үөрэхтээһин үнүстүтүүтүттэн Ньургуйаана Скрябина, АГАТУ приёмнай хамыыһыйатын үлэһитэ Мотрена Матаннанова бааллар. Ыалдьыттарбыт саҥа арыллыбыт пиэрмэр кылааһын уратытык тэрийэргэ, тыа сирин эдэр хаһаайыннарын үөрэтэр-иитэр үлэҕэ көмөлөһөргө бэлэмнэрин биллэрдилэр. Сүрүн сорук быһыытынан төрөппүттэргэ, үөрэнээччилэргэ тыа хаһаайыстыбатынан дьарыгырар билиҥҥи кэмҥэ саамай наадалаах идэ буоларын, ону оҕоҕо, төрөппүккэ өйдөтүү барыахтааҕын бэлиэтээтилэр.
Тыа хаһаайыстыбатын министиэристибэтин өттүттэн пиэрмэрдэри өйүүр граннар, араас субсидиялар, куонкурустар, АГАТУ түөрт факультета, үөрэнээччилэргэ АГРОНТИ олимпиадалар, араас таһымнаах ааҕыылар тустарынан сиһилии билиһиннэрдилэр.
Көрсүһүүгэ улуус үөрэҕин салалтатын начаалынньыгын солбуйааччы Эльмира Апросимова, «Мэҥэ нэһилиэгэ» тыа сирин түөлбэтин дьаһалтатын баһылыга Ньургун Габышев кытыннылар. Көрсүһүү түмүгүнэн, Балыктаах оскуолата, «Мэҥэ нэһилиэгэ» тыа сирин түөлбэтин дьаһалтата, АГАТУ, Тыа хаһаайыстыбатын министиэристибэтэ бииргэ үлэлииргэ сөбүлэҥ түһэрисэн, салгыы айымньылаах үлэ саҕаланарын туһунан алгыс тыллар этилиннилэр. Ыччаты сиргэ-уокка чугаһатар үлэ ситиһиилээх буолуо диэн, тыа сиригэр үлэҕэ-хамнаска интэриэһи сайыннарарга эрэл тылларынан бу истиҥ көрсүһүү түмүктэннэ.
Мария Захарова. Балыктаах
