Алтынньы 30 күнүгэр Аллараа Бэстээххэ Аан дойдутааҕы «Үрүҥ торуоска» күнүн чэрчитинэн ый устата ыытыллар аахсыйа иитинэн Мэҥэ Хаҥаласка «Илин эҥэр куубага» көрбөттөр уопсастыбаларын икки ардыларыгар күрэх ыытылынна.
«Парус» успуорт уораҕайыгар Таатта, Амма, Чурапчы, Мэҥэ Хаҥалас көрбөттөр уопсастыбаларын хамаандаларын улуус адаптивнай успуордун тириэньэрэ Алексей Стручков салайан киллэрдэ. Спортсменнары эҕэрдэ тылларын улуус дьокутааттарын сэбиэтин бэрэссэдээтэлэ Иннокентий Андросов, улуустааҕы физическэй култуура уонна успуорт управлениетын начаалынньыга Алексей Попов, көрбөттөр улуустааҕы уопсастыбаларын бэрэссэдээтэллэрэ Иван Семенов (Мэҥэ Хаҥалас), Светлана Дорофеева (Таатта), Александра Устинова (Амма), Василий Пономарев (Чурапчы) көрүстүлэр. Күрэх түһүмэхтэрин: «Калах», «Катамино», «Квиксо» остуол оонньууларын уонна волейбол хаамыытын уонна быраабылатын инбэлииттэр улуустааҕы уопсастыбаларын бэрэссэдээтэлэ, сүрүннүүр судьуйа Тамара Пермякова сиһилии быһаарда.
Успуорт күнүн кыттыылаахтарыгар Г.М.Артемьев аатынан Аллараа Бэстээх орто оскуолатын үөрэнээччилэрэ – «Кыталык» үҥкүү норуодунай ансаамбылын филиала, «Алаас оҕолоро» кэрэ үҥкүүнү толорон бэлэхтээтилэр.
Уопсай түмүккэ иккис миэстэни Амма хамаандата, үһүс миэстэни Чурапчы хамаандата ыллылар. Кыайыыны уонна көһө сылдьар куубагы Мэҥэ Хаҥалас хамаандата ситистэ.
Тамара Пермякова:
– «Илин эҥэр куубага» көрбөттөр уопсастыбаларын күрэҕэр 4 хамаанданан уопсайа 32 спортсмен кэллэ. Сыллата ыытыллар күрэххэ былырыын сүрүн уларыйыынан волейбол көрүҥэ киирбитэ, урут гонбол оонньотор этибит. Биһиги, уопсастыбалар, үлэбит биир сүрүн хайысхата – дьоммутугар успуорт, култуура тэрээһиннэрин тэрийиитэ буолар. Маннык тэрээһиннэр өрөспүүбүлүкэ таһымнаах күрэхтэргэ бэлэмнэнии бэрээдэгинэн ыытыллаллар, – диэтэ.
Иван Лукин.
