Алгыһынан сыдьаайар аал уоттаах саха балаҕана бытарҕан тымныылаах, томороон тохсунньулаах аар айылҕаҕа уһаарыллар саха норуотун суон дурдата-хаххата, үйэтин уһатар эрэллээх эркинэ буолар. Сылааһынан сыралыйар көмүлүөк оһохтоох балаҕаммыт норуот күн сырдыгар талаһар күүстээх санаатын, өбүгэ үгэһин утумнуур тускулаах олоҕун туоһулуур.
Норуот бүттүүн сөбүлээн истэр ырыаһыта, алгысчыт, СӨ култууратын туйгуна Виталий Очиров Хара нэһилиэгэр саха итэҕэлин түстүүр Үтүө балаҕан тутуллуутун иилии-саҕалыы, көҕүлүү сылдьарын дьон-сэргэ биһирии истибитэ. Талыы-талба Таатта улууһуттан төрүттээх Виталий Валерьевич Хара нэһилиэгин иккис дойду оҥостон, айан-тутан, силис тардан олорор, «Айыллаан» култуура киинигэр айымньылаахтык үлэлиир. Биир идэлээхтэрин кытта «Айыллаан аартыктара» айар бөлөҕү тэринэн ырыа ыллыктаах ыырыгар көрөөччү биһирэбилин ылар. Сыл устата балаҕан тутуллуутун тускулуур айар киэһэлэр, улуустарынан кэнсиэрдэр, үтүмэн үлэ ыытыллан «Үтүө балаҕан» уопсастыбаннай култуура киинэ бар дьоҥҥо ананар айымньылаах аартыгын арыйда. Күүдэпчилэнэ умайар көмүлүөктээх, үрдүк өһүөлээх, киэҥ-куоҥ балаҕан нэһилиэк киинигэр дьэндэйэ тутуллубут. Саха итэҕэлин тула норуоту сомоҕолуур аналлаах тутуу үөрүүлээх аһыллыыта балаҕан ыйын 15 күнүгэр ыытылынна.
Төрүт үгэһи оҥкуллуур бэлиэ түгэн Виталий Очиров айыылары айхаллыыр арыылаах алаадьылаах алгыһыттан саҕаланна. Мустубут бар дьон саҥа тутуу тупсаҕайын, норуокка ананар сырдык-ыраас эйгэлээҕин сөҕө-махтайа, кэрэхсии көрдүлэр. Бэлиэ түгэнинэн СӨ бырабыыталыстыбатын бэрэссэдээтэлин солбуйааччы Сергей Местников, улуус баһылыга Дмитрий Тихонов, СӨ култуура уонна духуобунай сайдыы министиэристибэтин сүрүн исписэлииһэ Майя Ермолаева, тыа хаһаайыстыбатын миниистирин эбээһинэһин толорооччу Анна Стручкова, Хара нэһилиэгин баһылыга Дария Назарова эҕэрдэлээтилэр. Салайааччылар Виталий Очировка саха итэҕэлин үйэтитэр, норуокка туһуланар бэриниилээх үлэтин иһин махтаннылар. Үтүө балаҕана бар дьону, кэнчээри ыччаты Айыыларга сүгүрүйүү, итэҕэл тула сомоҕолуур дириҥ суолталааҕын бэлиэтээтилэр.
Үөрүүлээх түгэни саха эстрадатын сулустара Эрхан, Анатолий Горохов, Роман Алексеев сахалыы ылбаҕай ырыанан киэргэттилэр. Бэлиэ күҥҥэ Виталий Очиров «Норуот уус-уран айымньытын сайдыытыгар кылаатын иһин» бэлиэнэн, «Айыллаан» култуура киинин балетмейстера Мария Романова, Иннокентий Сосин аатынан Киин бибилэтиэкэ Харатааҕы филиалын сүрүн бибилэтиэкэрэ Сахаяна Терентьева «СӨ култууратын туйгуна» бэлиэнэн наҕараадаланнылар.
Виталий Очиров норуокка махталын бэлиэтиир ымыы оҥостубут ыра санаата – Үтүө балаҕана олоххо киирбитин туһунан санаатын бу курдук үллэстэр:
- Үтүө балаҕан саха эйгэтин саҕан таһаарыаҕа. Кэнчээри ыччаты үтүөҕэ, сырдыкка иитиэҕэ. Балаҕан көрөөччүлэрбит, истээччилэрбит, бар дьон ытыһын доҕуһуолунан тутулунна. «Айыллаан аартыктара» бөлөхпүн кытта сэттэ улууска кэнсиэрдээн балаҕаммыт тутуллуутун маҥнайгы үбүн булбуппут. Бэйэм урбаанньыт быһыытынан урууларга ыллаабыт-туойбут, үлэлээбит-хамсаабыт үппүн үтүө санаанан балаҕан тутуутугар уктум. Итиэннэ «Сэргэ» хампаанньа тутуу матырыйаалынан көмөлөспүтэ.
Бу курдук, Үтүө балаҕана – алгысчыт, ырыаһыт Виталий Очиров норуотугар утары ууммут истиҥ бэлэҕэ буолла. Көмүлүөк уота күөх унаар буруонан күлүмнүү умайда, үтүө санаа эркинэ бар дьону сомоҕолоото.
Изабелла Романова.
