Аан дойдутааҕы дуобат федерациятын көҕүлээһининэн, алтынньы 20-31 күннэригэр Турция Анталия куоратыгар 100 харахтаах дуобакка оҕолор, ыччаттар, улахан дьон уонна бэтэрээннэр ортолоругар аан дойду чөмпүйэнээтэ буолла. Манна Турция, Арассыыйа, Польша, Эстония, Узбекистан, Казахстан, Кыргызстан, Грузия, Армения судаарыстыбаларыттан күүстээх дуобатчыттар күөн көрүстүлэр.
Мэҥэ Хаҥалас улууһуттан 14-гэр диэри саастаах уолаттарга Мэлдьэхси орто оскуолатын 7-с кылааһын үөрэнээччитэ, успуорт маастарыгар хандьыдаат Владимир Николаев, 20-гэр диэри саастаах ыччаттарга Мэлдьэхси нэһилиэгиттэн төрүттээх дуобакка успуорт маастара Прокопий Говоров, 60-тан үөһээ саастаах бэтэрээннэргэ ССРС успуордун маастара, Саха Өрөспүүбүлүкэтин дуобакка үтүөлээх тириэньэрэ Василий Куприянов, Майаттан успуорт маастарыгар хандьыдаат Антонина Федорова кытыннылар.
Күрэхтэһии түргэн, чаҕылҕанныы түргэн уонна сүрүн бырагыраамаларынан ыытылынна. Прокопий Говоров түргэн бырагыраамаҕа 1-кы миэстэни ылан, Аан дойду чөмпүйүөнэ буолла. Чаҕылҕанныы түргэн бырагыраамаҕа уонна сүрүн бырагыраамаҕа 2-с миэстэ буолуталаан, үрүҥ көмүс мэтээллэри кэттэ.
Василий Куприянов чаҕылҕанныы түргэн бырагыраамаҕа 3-с, түргэн уонна сүрүн бырагыраамаларынан 2-с бочуоттаах миэстэлэри ылла. Владимир Николаев түргэн бырагыраамаҕа 3-с, дуобат садаачаларын суоттааһыҥҥа 2-с, Антонина Федорова чаҕылҕанныы түргэн бырагыраамаҕа 3-с, түргэн бырагыраамаҕа 2-с буоллулар.
Уопсай түмүккэ 100 харахтаах дуобакка Арассыыйа норуоттар икки ардыларынааҕы кылаастаах гроссмейстердара Александр Гетманский Аан дойду чөмпүйүөнүнэн, Мурадулло Амриллаев иккис миэстэ, Айнур Шайбаков үһүс миэстэ, дьахталларга Аан дойду чөмпүйүөнүнэн Башкирия Дьоруойа Тамара Тансыккужина, иккис миэстэ Маргарита Федорова уонна үһүс миэстэ Айгуль Идрисова буоллулар.
60-тан үөһээ саастаах бэтэрээннэргэ Аан дойду чөмпүйүөнүнэн успуорт маастара Владимир Сергеев ааттанна. Успуорт маастара Василий Куприянов иккис, успуорт маастарыгар хандьыдаат Анатолий Мурунов (Таатта) үһүс, дьахталларга Аан дойду чөмпүйүөнүнэн успуорт маастара Вера Сурова (Арассыыйа), иккис миэстэ успуорт маастарыгар хандьыдаат Антонина Федорова уонна үһүс миэстэ Чурапчыттан Анастасия Собакина буоллулар.
Сүүс харахтаах дуобакка Аан дойду биирдиилээн бастыыр иһин күрэхтэһиитигэр Сахабыт сирин дуобатчыттара үрдүк ситиһиилээхтик кытыннылар. Чаҕылҕанныы түргэн бырагыраамаҕа 13, түргэн бырагыраамаҕа 16, сүрүн бырагыраамаҕа 15 уонна садаачалары суоттааһыҥҥа 6 мэтээл хаһаайыннарынан буоллулар. Барыта 50 мэтээлтэн 12 кыһыл көмүс, 19 үрүҥ көмүс, 19 боруонса мэтээллэри ыллылар.
Ол иһиттэн, Мэҥэ Хаҥаластар 1 кыһыл көмүс, 7 үрүҥ көмүс, 3 боруонса мэтээллэри ылан, барыта 11 мэтээли дойдуларыгар аҕаллылар.
Аан дойдутааҕы 100 харахтаах дуобат күрэхтэһиитигэр үрдүк ситиһиилээхтик кыттыбыт биир дойдулаахтарбытынан киэн туттан туран истиҥ эҕэрдэбитин ыытабыт.
Марелла Баишева.
