Майа сэлиэнньэтин олохтоохторо, ыал эбэлэрэ-эһэлэрэ Евдокия уонна Владислав Захаровтар дьиэ кэргэн быйыл сайын чааһынай кэтэх хаһаайыстыбаларын кэҥэттилэр.
Дьиэ кэргэн чилиэннэрин сибиэһэй, бэйэ аһынан хааччыйаары былырыын бэс ыйыгар 10 хаас, 18 куурусса чоппуускаларын уонна сибиинньэ атыыласпыттар. Өтөх дьиэлэригэр кыылларга аналлаах уйалары тутан кыһыны этэҥҥэ кыстаппыттар. Сайыннары-кыһыннары кыыллар астарын кутуйахтартан куоскалара Констанция харабыллыыр.
Быйыл Захаровтар дьиэ кэргэн бэйэлэрин күүстэринэн кэтэх хаһаайыстыбаларын кэҥэтэргэ инкубатор ньыматынан туһаммыттар. Онон 10 кус уонна 16 бройлер бөтүүк, 8 бройлер куурусса эбиллибит. Эбии Хаптаҕай нэһилиэгиттэн чааһынай ыалтан 6 индюк чоппуускаларын атыыласпыттар. Чугас аймахтара биэрбит 2 козалара төрөөннөр өссө 6 оҕо эбиллибит.
Кыһын устата сылаас дьиэҕэ аһаан улааппыт сибиинньэлэрин уонна бройлер бөтүүктэрин ыам ыйыгар идэһэлээн өр кэмҥэ сиир сымнаҕас, сыалаах эттэммиттэр.
Хаастар, кууруссалар сымыыттыыр, козалар ыанар кэмнэрэ буолан тохтоло суох тотоойу, битэмииннээх аһынан хааччыйаллар. Аҥаардас комбикормунан уонна тэлгэһэ отунан эрэ буолбакка, Владислав Захаров чугас сиртэн балыктаан, чааһынай олбуордар күөх отторун охсон ылан кэтэх хаһаайыстыбатын кыылларыгар эбии сиир астарын булар.
Эбэлээх эһэлэригэр Дьокуускайтан сайыҥҥы сынньалаҥнарыгар сиэннэрэ Авелия, Арчын, Дамир, Дархан күүс-көмө буола кэлбиттэрэ. Сиэннэр кыыллары тутан-хабан көрөн-истэн, аһатан, эбэлээх эһэлэрин кытта от тасыһан кэтэх хаһаайыстыбаҕа күүс-көмө буолаллар. Онон үлэ эйгэтигэр киирэн төлөпүөҥҥэ, интэриниэккэ аралдьыйбаттар. Коза үүтүн оҕолор олус сөбүлээн иһэллэр.
«Кэтэх хаһаайыстыбанан дьарыктаныҥ. Куттаммакка кыраттан саҕалааҥ, барыта табыллыаҕа. Бэйэҕэ сибиэһэй аһылык, тус дьарык баара олус үчүгэй!» – диэн Захаровтар дьиэ кэргэн дьоҥҥо-сэргэҕэ сонуннарын үллэстэллэр.
Иван Лукин.
