Туһата суохтан туһалааҕы таһааран, испит үүппүт хаҕыттан хаһаайыстыбаҕа туттуллар корзина оҥоруохха сөп.
Биһиэхэ наада: 5 устуука үүт хоруопката, анныгар анаан кыра фанера, тутааҕар — өрүллүбүт быа.
Саҕалыырбытыгар үүппүт хаҕын икки өттүттэн кырыйабыт. Ортотунан сиигэ баар сиринэн аҥаардыыбыт. Тас кумааҕытын сэрэнэн саралыы тардабыт (кумааҕыны күүскэ тартахха матырыйаал олус халыҥ гына сараланан хаалыан сөп).
Кырыйбыт матырыйаалбытын ис өттүн сууйабыт. Биэс хоруопка тута баар буолбат, онон мунньунарга испит үүппүт бүттэ да, хоруопканы суунан, хаһаанан, бэлэмнээн иһэр ордук. Оннук гымматтахха хоруопка иһигэр хаалбыт үүт тобоҕо аһыйан, сытыйан хаалар.
Бу матырыйаал тигэргэ олус табыгастаах. Бэлэмнээбит матырыйаалбытын иистэнэр массыынанан биир уһун илиис гына тигэбит. Төкүнүк форма оҥорон баран, анныттан степлер бэстэлиэтинэн фанераҕа иҥиннэрэбит.
Корзинаны киэргэтэргэ аат, этикиэккэ тигиэххэ сөп. Тутааҕар суон быа кырыйан, иистэнэр сабынан тигэн биэрэбит. Корзинабыт бэлэм буолар.
Бу корзинаҕа сибэкки олордуохха, оҕо оонньуурун хомуйуохха, онтон да атыҥҥа туттуохха сөп. Мин хортуоппуй харайар иһит оҥоһуннум. Ис өттө сууйарга-соторго олус табыгастаах.
Үүт хаҕын араастаан туһаныахха сөп. Ону өссө да кэпсээн, көрдөрөн иһиэхпит.
Тускутугар туһаныҥ!
Елизавета Неустроева.
