Ахсынньы 13 күнүгэр Мэҥэ нэһилиэгэр үөрүүлээх бэлиэ түгэн буолан ааста.
Балыктаах бөһүөлэгин «Сүрэх тыа» түөлбэтин биир ытыктанар, холобур оҥостор эйэҕэс сүбэһиттэрэ, элэккэй эбэлэрэ, норуот маастара, тыыл, үлэ бэтэрээнэ, Мэҥэ нэһилиэгин Бочуоттаах олохтооҕо Вера Григорьевна Заровняева 90 үбүлүөйдээх сааһын туолбут дьоро күнүгэр ыраахтан-чугастан уруу-аймах дьоно мустан эҕэрдэ бастыҥын анаатылар, уруйдаатылар-айхаллаатылар.
Амма Болугуруттан кыыһа Мария, күтүөтэ Юрий Яковлевтар, сиэннэрэ Миша, Алеша, Виктория, Егор, Дьокуускайтан кийиитэ Ольга, сиэннэрэ Андрей, Алеша Прибылыхтар, Дойдунуускайтан балта Ирина, күтүөтэ Алексей Кычкиннар, сиэннэрэ Вероника, Алена, Уус Алдан Суоттутуттан быраата Алексей, кийиитэ Прасковья Каратаевтар Вера Григорьевнаны өрөгөйдөөх үбүлүөйүнэн истиҥ эҕэрдэлэрин тиэртилэр, махтал тылларын анаатылар.
Нэһилиэк дьонун-сэргэтин аатыттан эҕэрдэтин «Мэҥэ нэһилиэгэ» тыа сирин түөлбэтин баһылыга Александр Куприянов, улуус дьаһалтатын, оройуон баһылыгын Дмитрий Тихонов аатыттан оройуон дьокутааттарын Сэбиэтин бэрэссэдээтэлэ Иннокентий Андросов, улууһун нэһилиэнньэ көмүскэллээх буолуутун биир кэлим киинин салайааччыта Иван Шестаков истиҥ эҕэрдэлэрин эттилэр, Эҕэрдэ суруктарын, бэлэхтэрин туттардылар.
Вера Григорьевна 1934 с. ахсынньы 13 күнүгэр Уус Алдаҥҥа Суотту нэһилиэгэр Күн сирин көрбүт. Кыра эрдэҕиттэн үлэҕэ эриллэн улааппыт буолан үлэ мындырын-сатабылын баһылаан араас үлэлэргэ үтүө суобастаахтык үлэлээн тыа хаһаайыстыбата сайдарыгар сүҥкэн кылаатын киллэрсибитэ. Уһун сылларга сопхуоска сүөһү көрүүтүгэр үлэлээбитэ. Кини таһаарыылаах үлэтэ үчүгэй түмүктэрдээх буолан элбэх Бочуотунай грамоталарынан, Махтал суруктарынан бэлиэтэммитэ. Нэһилиэгин сайдыытыгар сүҥкэн кылаатын киллэрсэр. Ииһинэн, быысапканан, оҕуруонан тиһэн киһи сөҕөр араас оҥоһуктарынан кыттан Култуура уонна успуорт эстэпиэтэтигэр сылын аайы лауреат, дипломант аатын сүгэн дьон-сэргэ биһирэбилин ылыаҕын ылар. Вера Григорьевна «Мэҥэ Хаҥалас улууһун норуотун маастара» бэлиэ хаһаайката.
Ытык киһибитигэр Вера Григорьевнаҕа доруобайдык, өссө да айа-тута, тулалыыр дьонуҥ тапталыгар уйдаран уһуннук олороргор баҕарабыт.
Мария Захарова. Балыктаах
