Мэҥэ Хаҥалас улууһугар бу күҥҥэ соҕотох Аҕа дойду Улуу сэриитин бэтэрээнэ, билигин Дьокуускай куоракка олорор Алексей Николаевич Березкин 1923 сыллаахха муус устар 10 күнүгэр Дьабыыл нэһилиэгэр холкуостаах дьадаҥы дьиэ кэргэҥҥэ төрөөбүтэ.
Бэтэрээн быйыл муус устар 10 күнүгэр 102 сааһын томточчу туолла. Ытык бэтэрээни Дьокуускай куораттааҕы нэһилиэнньэ көмүскэллээх буолуутун уонна үлэҕэ управлениетын салайааччытын эбээһинэһин толорооччу Людмила Анисимова, Ил Түмэн дьокутаатын, офтальмология өрөспүүбүлүкэтээҕи балыыһатын кылаабынай бырааһын Иван Луцкан көмөлөһөөччүтэ Анастасия Слепцова дьиэтигэр кэлэн эҕэрдэлээтилэр.
Бүгүн “Германияны кыайыы иһин”, “Японияны кыайыы иһин” мэтээллэрдээх Аҕа дойду Улуу сэриитин кыттыылааҕа, ССРС үлэтин, РСФСР успуордун бэтэрээнэ, Мэҥэ Хаҥалас улууһун, Дьабыыл нэһилиэгин Бочуоттаах гражданина, СӨ Бочуоттаах кырдьаҕаһа Алексей Николаевич Березкин 102 сааһын аһары үктээн олорор. Эдэригэр ханнык да үлэттэн толлубакка-чаҕыйбакка ылсан, баҕарбытын олоххо киллэрэн тэйэр үлэһит эр киһи барахсан олорон кэлбит олоҕо чахчы да чөл олох бастыҥ холобура буолар. Кини спортсмен, учуутал, суоппар, кадровай булчут, сиэмэһит, ыччат сүөһүнү төлөһүтээччи, оҕуруотчут, ыччат настаабынньыга, оскуола бэпэчиитэлэ, уопсастыбаннай диэйэтэл, оҕолоругар тапталлаах аҕа, уонтан тахса сиэн, сүүрбэччэ хос сиэн тапталлаах эһэтэ, хос эһэтэ буолар.
Ытык саастаах аҕатын М.Е.Николаев аатынан өрөспүүбүлүкэтээҕи 1-кы нүөмэрдээх Мэдиссиинэ киинигэр дьуһуурунай бырааһынан үлэлиир кыра кыыһа Татьяна Березкина сыа-сым курдук тутан, улахан тапталын иҥэрэн көрөр-харайар.
Березкиннар аймахха итии-истиҥ эҕэрдэ!
Марелла Баишева.