Ахтар-саныыр, киэн туттар Мэҥэм дьонун Саха Өрөспүүбүлүкэтин (Ил Түмэн) Судаарыстыбаннай Мунньаҕын уонна тус бэйэм ааппыттан Үрүҥ тунах ыһыаҕынан ис сүрэхпиттэн эҕэрдэлиибин!
Улуу Тунах Ыһыах биһиги сүдү баайбыт, киэн туттуубут, омукпут уратыта буолар. Үрдүк Айыыларга сүгүрүйэр, айгыр-силик айылҕабытын кытта алтыһар ытык-мааны күммүтүгэр норуоппут өйө-санаата түмүллэр, үс кута бөҕөргүүр, өрөгөй талаана арыллар. Ыһыах ил-эйэ, доҕордоһуу туонатынан, түмсүү түһүлгэтинэн буолар, омук быһыытынан олоххо тирэхтээхпитин, инникигэ эрэллээхпитин кэрэһилиир, онон бу алгыс ылынар, арчыланар күммүтүгэр бука бары кыынньар кымыһынан, арыылаах алаадьынан Орто дойду сырдык айыыларыгар сүгүрүйүөҕүҥ, ийэ сирбитигэр истиҥ иэйиибитин тиэрдиэхэйиҥ, үтүө-мааны дьоммутугар тускуну туһаайыаххайыҥ.
Күндү биир дойдулаахтарым, эһиэхэ барыгытыгар ийэ айылҕабыт торҕо күөҕүнэн тупсар-киэркэйэр кэмигэр чөл туруктаах олоҕу, этэҥҥэ буолууну баҕарабын! Төрөөбүт төрүт дойдубут сайда, силигилии турдун, дьоммут-сэргэбит дьоллоох-тускулаах буоллуннар, ханнык да ыарахаттартан толлубакка бары бииргэ тутуспутунан олохпут уйгутун оҥостуохайыҥ! Саха норуота эбиллэ — үксүү турдун, кыаҕа улаатан, күүһүрэн истин, кэнчээри ыччаппыт ситиһиилээх, дьулуурдаах, инникигэ эрэллээх буоллун!
Бары үтүөнү кытта, Ил Түмэн дьокутаата Олег МАРКОВ