Олунньу 21 күнүгэр Хорообут оскуолатыгар байыаннай-патриотическай ый чэрчитинэн, Аҕа дойдуну көмүскээччилэр күннэрин көрсө бэрт улахан тэрээһин ыытылынна.
Сарсыардаттан оҕолор байыаннай таҥас кэтэн үөрэннилэр. Аактовай саалаҕа байыаннай техникалар кэккэлээтилэр, пуормалар ыйаннылар, аҕаларбыт, убайдарбыт аармыйаҕа сулууспалаабыт хаартыскалара туруорулуннулар.
Кылаастар икки ардыларыгар кэккэнэн хаамыыны, ырыаны көрүү, эстэпиэтэ ыытылынна. Курэхтэһии байыаннай дьайыы кыттыылааҕар Александр Николаевич Бугаев сырдык кэриэһигэр ананна. Тэрээһин ыалдьыттарынан Хорообут нэһилиэгин баһылыга Гаврил Бродников, бииргэ төрөөбүт быраата, өрөспүүбүлүкэтээҕи лечебнай-медицинскэй реабилитация уонна спортивнай медицина инструктор мэтэдьииһэ Николай Бугаев, Александр Николаевич кыыһа, СӨ Тутууга миниистирин солбуйааччыта Сахаайа Бугаева, участковай инспектор Владимир Сергучев, Александр бииргэ үөрэммит доҕоро Федор Сергучев буоллулар. Кинилэр
истин тылынан үөрэнээччилэргэ эҕэрдэлэрин, хас биирдии үөрэнээччи төрөөбүт дойдутунан киэн туттуохтааҕын, таптыахтааҕын, этин-хаанын чэбдигирдэн, патриот буола иитиллэн, Ийэ дойдутун көмүскүүр буола улааталларыгар баҕардылар. Федор Степанович «Уол оҕо» ырыатынан эҕэрдэлээтэ. Александр Николаевич кылгас олоҕун, үлэтин, туохтан да толлон турбат, сыалын ситиһэр, киэн туттар Хорообут Хоһуун Уолана буоларын кэпсээтилэр. Үөрэнээччилэргэ холобур буолар, биһиги бырааппыт, оскуолабыт выпускнига Александр Николаевич олоҕун кэпсиир, дириҥ ис хоһоонноох анал истиэндэни оҥорторон туруордубут.
Кэккэнэн хаамыыга үрдүкү кылаастарга бастакы 9, иккис 10, үһүс 11, орто сүһүөххэ бастакы 7, иккис 5, үһүс миэстэ 6 кылаастар буолары ситистилэр. Военизированнай эстэпиэтэҕэ үрдүкү кылаастарга бастакы 11, иккис 10, үһүс 9, орто сүһүөххэ бастакы 6, иккис 7, үһүс миэстэ 5 кылаас кэлэктииптэрэ буоллулар. Бастыҥ хамандыырынан үрдүкү кылаастарга Миша Олесов, Юрий Жирков, Айхаан Мачахтыров, орто сүһүөххэ Эдгар Пинигин, Артем Сорокоумов, Виктор Птицын, кыра сүһүөххэ Одун Плотников, Давид Винокуров, Аркадий Пинигин ааттаннылар. «Снаряжение магазина» күрэхтэһиигэ Миша Олесов 22,75, Снежана Маркова 25,00, «Разборка, сборка автомата» Денис Попов 20,09, Виолетта Иванова 28,97, ОЗК көрүҥҥэ Денис Попов 2,48;84 бастыҥ көрдөрүүлэннилэр. Александр Бугаев дьоно, аймахтара анал мэтээллэри, грамоталары, бэлэхтэри туттардылар. Убайа Юрий Бугаев бириистэрин биирдиилээн курэхтэһии бастыҥнарыгар анаата.
Тэрийээччилэргэ Николай, Юрий Бугаевтарга, кыыһыгар Сахаайа Бугаеваҕа оскуола салалтатын аатыттан махталбытын биллэрэбит. Дьэ, ити курдук, хорообуттар
хорсун-ходуот, хоһуун уолаттарын ааттара үйэлэргэ умнуллубатын.
Октябрина Васильева.
