Арай аптаах буолларгын
Төннүөҥ этэ дуо ол кэмҥэ?
Оҕо сааскар, оскуолаҕар,
Хаалтыс бааммыт күннэргэр?
Горнай улууһун Өрт бөһүөлэгэр «Биһиги ССРС-тан төрүттээхпин» диэн аҕам саастаах дьоҥҥо аналлаах сайыҥҥы лааҕыр иккис сылын ыалдьыттары көрсөн үлэлиир. Бырайыагы Анна Дормидонтова бэрэссэдээтэллээх «Самородок» кэмиэрчэскэйэ суох тэрилтэ Бэрэсидьиэн гранын быһыытынан ылары ситиспит.
Бастакы сезоҥҥа оҕо саастарын ахтан-санаан ылаары, күөх сайыны туһалаахтык атаараары 20 пионер өрөспүүбүлүкэ араас муннугуттан мустубут. Пионерскай этэрээккэ биһиги улуустан төрдүөлэр – Төҥүлүттэн Александра Куприянова, Табаҕаттан Татьяна Зыкова, Наахараттан Глафера Михайлова, Ходороттон Варвара Степанова бааллар.
Лааҕыр начаалынньыга, Солоҕон нэһилиэгин баһылыгын солбуйааччы, бырайыак ааптара Мария Павлова лааҕыр туһунан маннык кэпсиир: «Бу бырайыак биэс сыл аннараа өттүгэр төрөөбүтэ. Нэһилиэкпитигэр «Мы из ССРС» диэн ретро-мусуой арыллыбыта. Ол мусуойга аҕам саастаах дьон кэлэн урукку тутта сылдьыбыт малларын көрөн олус үөрэллэрэ, сүргэлэрэ көтөҕүллэрэ, оҕо саастарыгар төннөн ылар курдуктара. Ол иһин кинилэргэ анаан тугу эрэ толкуйдуохха баар эбит ээ диэн санаа үөскээбитэ. Ону олоххо киллэрээри, араас куонкурустарга кыттыбыппыт. Былырыын Үлэ уонна социальнай сайдыы министиэристибэтин куоҥкуруһун кыайан бастакыбытын тэрийбиппит. Быйыл былырыыҥҥы уопуппутугар олоҕуран иккистээн суруйан, Арассыыйа Бэрэсидьиэнин гранын ылары ситистибит. Лааҕыры икки сменанан үлэлэтэр былааннаахпыт. Бастакы сменабыт номнуо түмүктэнэн эрэр. Хас биирдии сменаҕа 20 аҕам саастаах дьону ылабыт.
Быйыл нэһилиэкпитигэр «Өбүгэ ситимин сыла» биллэриллибитэ, онон лааҕыр ол чэрчитинэн үлэлиир. Бастакы сменаҕа улууспут нэһилиэктэриттэн сайаапка көрдөөбүппүт да, аҕыйах киһи суруйтарбыта. Онон ким баҕалаахха диэн биллэрии ыытан дьон хомуйдубут. Билиҥҥи туругунан 40 миэстэҕэ 60 сайаапка киирэн сытар. Солоҕон нэһилиэгэр 5 түмэллээхпит, аҕам саастаах пионердар 4 түмэли көрдүлэр. Араас куруһуоктарга, маастар-кылаастарга кытыннылар. Саастаах дьон сыыппара эйгэтигэр билбэтэ элбэх, сыстаҕаһа суох буолан, албыҥҥа киирэн биэриитэ элбэх, ол иһин быйылгыттан сыыппараҕа билиини сайыннарар куруһуогу эбэн биэрдибит. Солоҕон нэһилиэгэр уһуллубут икки киинэлээхпит, киэһэтин бары мустан олорон, киинэлэри көрдүлэр. Сарсыарда аайы эти-сиини чэбдигирдэн сэрээккэлииллэр. Күҥҥэ биэстэ иҥэмтиэлээх аһынан аһыыллар. Дьиэ иһигэр толору хааччыллыы баар.
Лааҕыр үөрүүлээх арыллыытыгар эстрада сулуһа Айгылаан уонна Эрчим ылбаҕай ырыанан эҕэрдэ кэнсиэртэрин бэлэх ууннулар.
Маннык эппиэтинэстээх, сыралаах үлэбитигэр нэһилиэкпит баһылыга Александра Александрова, оскуолабыт дириэктэрэ Прокопий Тимофеев көмө, тирэх буолалларыгар махтанабыт».
Сэргэхтик уонна көхтөөхтүк сынньана сылдьар Ходороттон Варвара Степанова лааҕыр туһунан санаатын маннык үллэһиннэ: «Оҕо сааспытын эргитэн, кылгас да кэмҥэ дьоллонон ыллыбыт. «Пионерскай саһарҕанан» уһуктан, пионер пуорматын кэтэн, значок, кыһыл хаалтыс баанан, мэктиэ тыл этэн, пионер ырыатын ыллаан, стройунан хаамтыбыт. Кутаа тула олорон, оҕо сааһы эргитэн ыллыбыт. Лааҕыр дьиэтэ-уота, аһа-үөлэ астык. Үлэһиттэрэ эдэрдэр, олус кыһамньылаахтар.
Асчыппыт аһа-үөлэ олус минньигэс, күн аайы уларыйа сылдьар: кус миинэ, ис миинэ, сибиэһэй сүөгэй, суорат, быырпах, оннооҕор мунду миинин кытта амсайдыбыт.
Норуот ырыаһыта Раиса Захарова олорбут дьиэтигэр, норуодунай бэйиэт Савва Тарасовка аналлаах түмэли көрдүбүт. Олус үчүгэйдик сынньанныбыт».
Бу лааҕыр сынньалаҥ эрэ лааҕыра буолбакка, урукку кэмнэргэ төннөрөр массыына кэриэтэ эбит. Манна көлүөнэҕин кытта алтыһан, эргиллибэт кэрэ кэмнэри ахтыһан, оҕо саас ыраас кэмнэригэр төннөн ылаҕын. Манна эн урукку бэйэҕин өйдүүгүн, ким буолбуккун туораттан көрөҕүн, өссө да ким буолуоххун сөбүн ыралыы саныыгын… Пионер эн дууһаҕар хаһан да кырдьыбат…
Елизавета Неустроева.
