Мэҥэ Хаҥалас улууһун Алтан нэһилиэгэр аҕам саастаах көлүөнэ өбүгэттэн илдьэ кэлбит муҥха үөрүйэхтэригэр сыллата оскуола оҕолорун уһуйбуттара 10-тан тахса сыл буолла. Муҥханы нэһилиэк бэтэрээннэрин сэбиэтин салайааччы, успуорт инструктор Гаврил Попов оскуола учууталларын кытта иилээн-саҕалаан ыыталлар.
Куталаах диэн күөллэрин Алтан орто уонна коррекционнай оскуола оҕолоругар анаан муҥхалатар үтүө үгэстэрэ олохтонон, үүнэр ыччаппыт айылҕаҕа сыддьар сиэри-туому билэн улаатара инники олохторугар туһалаах буолуоҕа. Гаврил Элестофорович аал уотун оттон, алаадьынан айах тутан Үрдүк Айыыларыттан, күөл иччитэ Күөх Боллохтон көмүс хатырыктааҕын өлүүлээн бэрсэригэр көрдөстө.
Куталаахтарыгар сэтинньи сэттистиир бэлиэ күнүгэр учууталлардыын оҕолордуун 30-ча буолан биирдэ түһэннэр, 23 куул балыгы бастылар. Бу курдук сыллата көмүс хатырыктааҕынан күндүлүүр Эбэлэрин Күөх Боллох иччитэ илии тутуурдаан, өттүк харалаан ыытта.
Муҥхаһыттар кыралыын-улаханныын Эбэлэригэр махтанан, кууллуу курдук эмис соболоох үөрэн-көтөн тарҕастылар.
Марелла Баишева.
