Олунньу 26 күнүгэр Ходоро нэһилиэгин В.В.Скрябин аатынан орто оскуолатыгар «Мин – баһылыкпын» улуустааҕы дьыалабыай оонньуу ыытылынна.
Манна улууспут түөлбэлээн сытар нэһилиэктэриттэн сүүмэрдэнэн 8 бастыҥ, лиидэр уолаттар – А.А.Пахомов аатынан Тиэлиги орто оскуолатын 8-с кылааһын үөрэнээччитэ Василий Захаров, Г.И.Соловьев аатынан Ороссолуода орто оскуолатын 10-с кылааһын үөрэнээччитэ Дамир Иванов, И.Г.Тимофеев аатынан Майатааҕы лиссиэй 10-с кылааһын үөрэнээчитэ Ярослав Ксенофонтов, М.П.Габышев аатынан Балыктаах орто оскуолатын 8-с кылааһын үөрэнээчитэ Эрсан Габышев, А.С.Шахурдин аатынан Төҥүлү орто оскуолатын 8-с кылааһын үөрэнээчитэ Эльдар Скрябин, Д.С.Федоров – Дмитрий Таас аатынан Хорообут орто оскуолатын 8-с кылааһын үөрэнээчитэ Юрий Жирков, М.Е.Попов аатынан Аллараа Бэстээх орто оскуолатын 8-с кылааһын үөрэнээчитэ Артем Саввинов, И.Г.Игнатьев аатынан аатынан Хара спортивнай орто оскуолатын 11-с кылааһын үөрэнээчитэ Станислав Устинов өйдөрүн-санааларын, билиилэрин-көрүүлэрин тургутаары кэллилэр.
Күрэс СӨ норуотун хаһаайыстыбатын үтүөлээх үлэһитэ, бэлиитикэ бөдөҥ диэйэтэлэ, Мэҥэ Хаҥалас улууһун бастакы баһылыга, Мэҥэ Хаҥалас уонна Хаҥалас улуустарын бочуоттаах олоохтооҕо, Санкт-Петербург куоракка СӨ бастакы бастайааннай бэрэстэбиитэлэ Василий Васильевич Скрябин сырдык кэриэһигэр ананан иккис төгүлүн ыытыллынна.
«Мин – баһылыкпын» куонкурус уол оҕо дириҥ өйдөбүллээх, киэҥ билиилээх, ырааҕы ыраҥалыыр киэҥ толкуйдаах буоларын ситиһэр, төрөөбүт дойдуга, Ийэ сиргэ үтүө сыһыаҥҥа иитэр, уол оҕону, эр киһини өрө тутан уопсастыбаҕа билиһинэрэр, киэҥ эйгэҕэ таһаарар, аҕа оруолугар болҕомто ууран, бэйэ-бэйэҕэ истиҥ доҕордуу сыһыаны үөскэтэр сыаллаах-соруктаах ыытыллар. Күрэх түмүгүнэн муҥутуур кыайыылаах өрөспүүбүлүктэтээҕи «Басхан» дьыалабыай оонньуу финалыгар улуус аатыттан кыттар кыаҕы ылар.
Дьүүллүүр сүбэҕэ улуус дьаһалтатын үлэһиттэрин уонна тэрээһин үлэни салайар сулууспа салайааччыта Станислав Захаров, экэнэмиичэскэй сайдыы управлениетын салайааччыта Лилия Игнатьева, социальнай бэлиитикэ управлениетын салайааччыта Октябрина Кулешова, үөрэх управлениетын салайааччытын солбуйааччы Михаил Петров, үөрэх управлениетын иитии уонна эбии үөрэхтээһин салаатын сүрүннүүр исписэлииһэ, «Мин – баһылыкпын» дьыалабыай оонньуу бастакы көҕүлээччитэ Милан Илларионов, «Мэҥэ кэскилэ» улуустааҕы патриотическай иитиигэ тирэх киин салайааччыта, «Оҕо саас сирдьиттэрэ» федеральнай бырайыак улууска сүрүннээччитэ Марианна Монастырева уонна нэһилиэк баһылыгын бастакы солбуйааччы Мария Тимофеева үлэлээтилэр.
Тэрээһиҥҥэ түсчүт Зиновий Игнатьев саха дьонун сиэринэн алгыс маанытын көтөхтө. «Дохсун» уолаттар бөлөхтөрө (ааптар – Мария Кылабысова, салайааччы Клара Попова), «Сардаҥа» ансаамбыл (салайааччы Февронья Нестерова) толоруулара киэргэттэ.
Күн устата уолаттар “Удьуор утума”, “Төрөөбүт түөлбэм табыгастаах эйгэтэ – дьоһун олох төрдө”, “Дойду салайааччылара мин тус бэйэм көрүүбүнэн”, “Өркөн өй”, дьыалабыай оонньуу (дебат) түһүмэхтэрин аастылар. Дьүүллүүр сүбэ күрэс кыайыылааҕын быһаарда, анал ааттаах наҕараадалары туттарда.
Оонньуу түмүгүнэн «Мин – баһылыкпын» улуустааҕы дьыалабыай оонньуу кыайыылааҕынан И.Г.Тимофеев аатынан Майатааҕы лиссиэй 10-с кылааһын үөрэнээчитэ Ярослав Ксенофонтов буолла.
Иван Лукин.
