Дьокуускай куоракка балаҕан ыйын 25 күнүгэр анал байыаннай дьайыы кыттыылаахтарыгар көмөлөһөр сыаллаах “Саха сирэ эйиигинниин” өрөспүүбүлүкэтээҕи уопсастыбаннай хамсааһын 2022 с. балаҕан ыйын 26 күнүттэн тэриллэн үлэлээбитэ 4 сыла бэлиэтэннэ.
Хамсааһын тэрийээччилэрэ ДОСААФ дьиэтигэр миэстэ ыланнар, волонтердар бэйэлэрин үтүө санааларынан, аһыныгас сүрэхтэринэн, дьиэлэриттэн, тус үлэлэриттэн быыс булан кэлэн, элбэх хайысхалаах араас үлэни ыыталлар. Ол курдук, бу сыллар тухары байыас таҥнарыгар табыгастаах гына тигиллибит ис-тас таҥастар, окуопа чүмэчилэрэ, аһынан-үөлүнэн, харчынан, эминэн-томунан гуманитарнай көмө, харысхал сиэккэлэр, алгыстаах харысхаллар, о.д.а. байыаннай чаастарга, госпиталларга былааннаахтык ыытыллан кэллилэр.
Бүлүү, Мэҥэ Хаҥалас, Уус Алдан, Нам, Горнай улуустарын иистэнэр сыахтара “Саха сирэ эйиигинниин” өрөспүүбүлүкэтээҕи хамсааһын филиалларынан буолаллар.
Билигин хамсааһыҥҥа 3000-тан тахса волонтер үлэлиир. Кинилэр истэригэр сүүстэн тахса иистэнньэҥ баар. Түөрт сыл устата 146 туонна гуманитарнай, 5919 тус аадырыстаах көмө, 5 туонна эмп-томп, 567551 хаһаайыстыбаннай табаар, 15000-тан тахса квадратнай миэтэрэ харысхал сиэккэ, о.д.а.оҥоһуллан тиэрдиллибит. Бу туһунан слайданан улахан экрааҥҥа көрдөрүлүннэ.
Бу күн волонтердарга махтана ДОСААФ өрөспүүбүлүкэтээҕи салаатыттан Константин Копылов, СӨ ыччат миниистирин Петр Шамаев солбуйааччыта, анал байыаннай дьайыы кыттыылааҕа Александр Максимов, “Биир ньыгыл Арассыыйа” баартыйа Саха сиринээҕи салаатын ситэриилээх кэмитиэтин салайааччыта Надежда Селютина, Дьокуускай куорат баһылыгын патриотическай иитиигэ солбуйааччыта Валентин Романов, Донбааска көмө уонна өйөбүл Хотугулуу-Илиҥҥи пуондатын, “Кыайыыга – бииргэ” хамыыһыйа өрөспүүбүлүкэтээҕи ыстаабын киинин салайааччыта Георгий Куркутов, РФ уопсастыбаннай балаататын чилиэнэ, СӨ биир идэлээхтэрин сойууһун бэрэссэдээтэлин солбуйааччы, Саха сирин дьахталларын сойууһун бэрэссэдээтэлэ Валентина Кириллина, о.д.а. кэлбиттэр. Кинилэр тэрээһин кыттыылаахтарын эҕэрдэлээтилэр уонна сүҥкэн көмөлөрүгэр махтанан туран, ордук көхтөөх волонтердарга наҕараадалары туттардылар. Ыалдьыттар волонтердар үлэлэригэр көмөлөһөн, туһалаах малы-салы бэлэх аҕалбыттарын “Саха сирэ эйиигинниин” ыстаап салайааччыта Анна Ефимоваҕа ытыс тыаһын ортотугар туттардылар.
Майатааҕы “Түмэн” уопсастыбаннай холбоһук салайааччыта Мария Лукина түмсүүлэр салайааччыларын, көхтөөх волонтердарын илдьэ онуо буолан кыттыыны ыллылар.
Волонтер хамсааһыныгар киллэрбит кылааттарын, патриотизм тыынын иҥэриигэ көхтөөх гражданскай сыһыаннарын итиэннэ анал байыаннай дьайыы кыттыылаахтарыгар көмөлөрүн иһин Людмила Пивоварова, Степан Копырин Арассыыйа Федерациятын Сэбиэтин Махтал суругунан, Евдокия Семенова Саха Өрөспүүбүлүкэтин бырабыыталыстыбатын бэрэссэдээтэлэ Ольга Балабкинаттан Махтал суругунан, Анастасия Попова ыччат миниистирэ Петр Шамаевтан Бочуоттаах Грамотанан, Антонина Петрова, Лена Васильева Махтал суругунан, Тимофей Нестеров, Валентина Лонгинова, Любовь Саввина түөскэ кэтиллэр бэлиэнэн наҕараадаланнылар.
“Саха сирэ эйиигинниин” уопсастыбаннай хамсааһын салайааччыта Анна Ефимова норуот күүһүн тэҥэ элбэх урбаанньыт успуонсардаан көмөлөспүттэрин бэлиэтээтэ. Кини көмөлөһөр, өйүүр салайааччыларыгар, көхтөөх волонтердарга Махтал суругу кытта өйдөбүнньүк бэлэхтэри туттарда.
Тэрээһини СӨ култууратын туйгуна, биллиилээх ырыа айааччы, СӨ байаныыстарын сойууһун салайааччы Алексей Потапов уонна кини солбуйааччыта, аккордионист Илья Иванов иилээн-саҕалаан ыыттылар уонна ырыаларынан-тойуктарынан киэргэтэн, волонтердарга дьоро күнү бэлэхтээтилэр.
Марелла Баишева.
