Ахсынньы 26 күнүгэр “Лира” банкеттыыр саалаҕа Майатааҕы “Түмэн” уопсастыбаннай холбоһук 2025 сылы түмүктүүр, 2026 сылы көрсөр тэрээһинэ салайааччы Мария Лукина сценарийынан үрдүк таһымнаахтык ыытылынна.
Манна Мария Сергеева салайааччылаах “Сэрии сылын оҕолоро”, Анна Павлова салайааччылаах “Эргиэн бэтэрээннэрэ”, Евдокия Семенова салайааччылаах “Түһүлгэ”, Марфа Алексеева салайааччылаах “Умсулҕан”, Людмила Пивоварова салайааччылаах “Кыталык Тыын”, “Дьүөгэлэр, отонньуттар” түмсүүлэрэ, “Сыдьаай” үҥкүү бөлөҕө уонна Дьокуускай куораттан анал байыаннай дьайыыга ыҥырыллан барбыт байыастары өйүүр, көмөлөһөр “Саха сирэ эйиигинниин” өрөспүүбүлүкэтээҕи уопсастыбаннай хамсааһын волонтердара итиэннэ Тумултан, Бүтэйдээхтэн ыалдьыттаатылар.
Дьоро күнү “Түмэн” сүбэтэ иилээн-саҕалаан ыытта. “Түмэннэр” ыытар тэрээһиннэрин солбуллубат ыытааччылара, “Эргиэн бэтэрээннэрэ” түмсүү салайааччыта, быйыл иккис төгүлүн ыытыллыбыт “Ассорти” сынньалаҥ киэһэтигэр иккис төгүлүн кууллаах собону бириис туруоран дьоһун көмөнү оҥорбут Анна Павлова уонна Майа сэлиэнньэтигэр “Бастыҥ уопсастыбанньык – 2025” анал аат кыайыылааҕа Степан Копырин , мэлдьи буоларын курдук, өрө көтөҕүллүүлээхтик үрдүк таһымҥа ыыттылар.
Бастакынан ыалдьыттарбытыгар тыл бэриллэн, салайааччы Анна Ефимова илдьэ кэлбит дэлэгээссийэтин билиһиннэрдэ, ыытыллан кэлбит үлэни-хамнаһы сырдатта. Кини анал байыаннай дьайыы саҕаланыаҕыттан үлэлэспит “Түмэн” волонтердарыгар махтал суруктары кытта “Саха сирэ эйиигинниин” өрөспүүбүлүкэтээҕи уопсастыбаннай хамсааһын волонтера буолалларын туоһулуур сибидиэтэлистибэлэри туттарда. Маны Людмила Пивоварова, Антонина Петрова, Полина Осипова, Евдокия Семенова, Степан Копырин, Татьяна Попова туттулар. “Түмэн” салайааччыта Мария Лукинаҕа итилэри сэргэ анал статуэтка туттарда. Ыалдьыттарбыт тымныы үгэннээн турар кэмигэр кэлэн сылааһынан илгийдилэр, үгүс үөрүүнү бэлэхтээтилэр. Үлэлиири сатыылларын курдук, сынньалаҥы эмиэ көхтөөхтүк атааран , үҥкүү, оонньуу аайы киирэн үөрэ-көтө кыттан, тэрээһини киэргэттилэр. Салайааччы Анна Ефимова бары куонкурустарга бэйэтинэн ситиһиилээхтик кыттан дьону көҕүлээтэ.
Степан Копырин ырыаларынан, “Кыталык Тыын”, “Сыдьаай” үҥкүү бөлөхтөр үҥкүүлэринэн, түмсүүлэр эҕэрдэлэринэн абылаҥнаах түһүлгэ төрүттэннэ. “Кийииттэр” түмсүү салайааччыта, суруйааччы Инна Николаева “түмэннэргэ” анаабыт хоһоонунан эҕэрдэлээтэ уонна салайааччы Мария Дмитриевнаҕа бэлэх уунна. “Сэрии сылын оҕолоро” түмсүү салайааччыта Мария Сергеева сэрии сылын оҕолорун ааттарыттан эҕэрдэлээн туран бэйэтин хоһоонун анаата.
“Парус” успуорт киинин тириэньэрэ Темир Сыдыкбеков эҕэрдэлээтэ. Кини эдэрдэри уопсастыбаннай дьыалаҕа сыһыаран үлэлэтэригэр махтанан Мария Дмитриевнаҕа өйдөбүнньүк бэлэҕин туттарда.
Бырааһынньыктааҕы киэһэҕэ тигии мааны былаачыйаҕа, маскарааттарга, хаатыҥкаҕа, үҥкүүгэ, оонньууга саамай көхтөөх остуолга, көхтөөх баараҕа “Король и королева” куонкурустар ыытылыннылар. Антонина Петрова Саҥа Дьыллааҕы ыйытыктарынан оонньуу ыытта, “12 ый” остуоруйаны туруорда.
“Сыдьаай” үҥкүү ансаамбыла “Национальное достояние России” куонкуруска кыттаннар ОТР ханаалга биэриигэ уһуллан, үүнэр сыл тохсунньутугар Москваҕа “Щелкунчик” биэриигэ кытта барар буолбуттара. Ансаамбыл тэриллиитигэр уонна куонкурустарга ситиһиилээхтик кыттарыгар күүс-көмө буолбуттарыгар махтанан салайааччылар Розалия Шарина, Оксана Иванова Мария Лукинаҕа, Екатерина Баишеваҕа сэмэй бэлэхтэрин туттардылар.
Икки Тымныы Оҕонньор, икки Хаарчаана уонна саҥа сыл символа, гимнастика куруһуогун иитиллээччитэ Алена Шахурдина киирэннэр үүнэр сылынан эҕэрдэлээтилэр. Алена гимнастика хамсаныыларынан кэрэ трюктары көрдөрөн дьону-сэргэни үөртэ.
Михаил Егоров бэрэссэдээтэллээх, Анна Алексеева, Мария Лукина чилиэннэрдээх дьүүллүүр сүбэ үлэлээтэ. Куонкурустар кыайыылаахтара бириистэринэн бэлиэтэннилэр.
“Король и королева” куонкурус кыайыылаахтарынан Петр Макаров, Екатерина Заровняева тахсаннар хоруоналары кэттилэр.
“Түмэннэр” уонна “Саха сирэ эйиигинниин” өрөспүүбүлүкэтээҕи уопсастыбаннай хамсааһын волонтердара үүнэр Үрүҥ Айыы Тойон сылыгар саҥа күүһүнэн үлэлииргэ сэрээттэнэн, үөрэн-астынан, бэйэ бэйэлэригэр махтанан тарҕастылар.
Марелла Баишева.
