Бу күннэргэ улууспут успуорду сэҥээрээччилэрин болҕомтотугар биир үөрүүлээх сонун көтөн кэллэ.
Оҕо-ыччат успуорка оскуолатын ох саанан ытыыга иитиллээччитэ, В.П.Ларионов аатынан Майа орто оскуолатын 9-с кылааһын үөрэнээччитэ Володя Рожин Арассыыйа успуордун маастарын нуорматын толордо. Бу 14 саастаах оҕоҕо кырата суох көрдөрүү.
Вова оҕунан ытыыга дьарыгын 5-с кылааска үөрэнэ сылдьан саҕалаабыта. 2021 сыл күһүнүгэр, хамсык ыарыы кэмигэр, сыл аҥаарын устата оҕолор сорудах ыланнар дьиэлэригэр дьарыктанар этилэр. 2022 сылтан саалаҕа кэлэн аан бастаан ох сааларын көрөн, үөрэтэн барбыттара. Уол бастаан классическай ох саа көрүҥүнэн дьарыктанан саҕалаабыта. Ол сылтан күрэхтэһиилэргэ кыттан барбыта.
Володя 2024 сыл кулун тутарыгар Т.С.Стасова аатынан классическай оҕунан ытыыга өрөспүүбүлүкэтээҕи аһаҕас турнирга кыттан 2-с бириистээх миэстэни ылбыта. Онтон блочнай оххо көһүөн баҕарарын биллэрэн, классическайтан блок оҕунан дьарыкка көспүтэ. Ый буолаат, муус устарга номнуо Алдаҥҥа баран блочнай оҕунан ытыы күрэһигэр кыттар.
– Онтон ыла Вова ыһыктыбакка блок оҕунан күннэтэ дьарыктанан кэккэ ситиһиилэннэ, — диэн кэпсиир эдэр спортсмен тириэньэрэ Айталы Артамонова. – Блочнай оххо көспүтэ алтыс ыйыгар, 2024 сыл алтынньытыгар В.А.Михайлова аатынан биирдиилээн уонна хамаанданан бастыыр иһин өрөспүүбүлүкэ турнирыгар 533 очукуоттан 530 ылан, Арассыыйа успуордун маастарыгар хандьыдаат нуорматын толорбута. Салгыы бастакытын «Арассыыйа эрэллэрэ» Аан дойду күрэһигэр Псков уобалаһыгар тиийэн бэйэтин рекордун ситэн, 544 очукуону ылбыта. Сыл бүтэһигэр өрөспүүбүлүкэҕэ бастыыр иһин киирсиигэ 4-с көрдөрүүлэнэн, Саха сирин иккис сүүмэрдэммит хамаандатын састаабыгар киирбитэ.
Охчут уол быйыл итинник элбэх араас таһымнаах күрэхтэһиилэргэ кыттан, номнуо 11 ыйынан, балаҕан ыйыгар, Арассыыйа успуордун маастарын нуорматын толорбут. Чебоксары куоракка буолбут Арассыыйа куубагар Володя Рожин иккитэ сүүмэрдиир ытыыга кыайан баран түмүккэ, үсүһүгэр, норуоттар икки ардыларынааҕы кылаастаах маастарга Дмитрий Старостиҥҥа 5 очукуонан хотторон туораабыт. Арассыыйа таһымыгар 73 эр дьонтон 17-с миэстэни ылыы – бу үрдүк көрдөрүү буолар. 9-с кылаас оҕото улахан дьону кытта бэркэ киирсибит диэн бэлиэтиэххэ сөп.
“Ити курдук Вова күрэхтэһиигэ кыттыыны ыларын сөбүлээн, биир да күрэһи көтүппэккэ кытта сылдьар. Онуоха киниэхэ төрөппүттэрэ Ньургун, Оксана Рожиннар мэлдьи өйөбүл буолаллар,” – диир тириэньэрэ Айталы Дмитриевна итиэннэ охчуту иитэн таһаарыыга старшай тириэньэр Прокопий Васильев өҥөтө эмиэ баар диир.
Вова Рожин бу күннэргэ үргүлдьү Казань куоракка тиийэн, РФ Генеральнай борокуруорун куубагын бүтүн Арассыыйатааҕы күрэһигэр кыттаары сылдьар. Киниэхэ бу күрэскэ уонна успуорка инники улахан түһүлгэлэргэ ситиһиини, улууһун, Сахатын сирин ааттата сылдьарыгар баҕарабыт.
Февронья ОХЛОПКОВА.
