Виталий Андросов сырдык аатыгар сүгүрүйэн

Бэлиэ тэрээһин

Бүгүн, атырдьах ыйын 7 күнүгэр, СӨ култууратын үтүөлээх үлэһитэ, РФ Үрдүкү анал үөрэхтээһинин бочуоттааах үлэһитэ, СӨ доруобуйатын харыстабылын туйгуна, Саха Хомсомуолун бириэмийэтин лауреата, Мэҥэ Хаҥалас улууһун Бочуоттаах олохтооҕо Виталий Тимофеевич Андросов төрөөбүтэ 75 сылын туолла.

Ытыктыыр, киэн туттар биир дойдулаахпыт бу кэрэ-бэлиэ үбүлүөйүгэр анаан Майаҕа «Андросов FEST» диэн ааттаммыт киэҥ бырагыраамалаах иммерсивнэй бэстибээл ыытылынна. Иммерсивнэй диэн тыл суолтатын судургутук быһаардахха ‒ ыытыллар тэрээһиҥҥэ киһи туораттан көрөн олорбокко, биир эйгэҕэ киирэн тэҥҥэ кыттыһарын ситиһии. Онон бүгүҥҥү бэстибээл бэрт интэриэһинэй ис хоһоонноох тэрилиннэ.

Бэстибээл үлэтигэр СӨ култуураҕа уонна духуобунай сайдыыга миниистирэ Афанасий Ноев кыттыыны ылла. Бэлиэ тэрээһин биэс түһүмэҕинэн киэҥ эйгэни хабар сыаллаах үгүс дьону түмэн далааһыннаахтык ааста.

«Өйдөбүнньүк» түһүмэҕинэн саҕаламмыт бэстибээл биир кэрэ-бэлиэ умнуллубат түгэнинэн М.К.Попова аатынан Майатааҕы оҕо ускуустубатын оскуолатын байаан кылааһыгар Виталий Андросов аатын иҥэриинэн мемориальнай дуосканы аһыы буолла. Үөрүүлээх тэрээһиҥҥэ ыраахтан-чугастан кэлбит ыҥырыылаах ыалдьыттар, Виталий Андросов чугас доҕотторо, аймах-билэ дьоно, ускуустуба оскуолатын үөрэнээччилэрэ, уһуйааччылара кытыннылар. Кинилэр ортолоругар СӨ Судаарыстыбаннай Мунньаҕын вице-спикерэ Александр Жирков, Ил Түмэн дьокутааттара Андрей Находкин, Олег Марков, Захар Никитин, Виталий Тимофеевич оҕолоро, бииргэ төрөөбүт балта, чугас доҕотторо – тэхиньиичэскэй билим дуоктара, Арассыыйа Наукаларын академига, Арассыыйа Наукаларын академиятын Сибиирдээҕи салаатын Дьокуускайдааҕы научнай киинин генеральнай дириэктэрэ Михаил Лебедев, мэдиссиинэ билимин дуоктара, профессор, СӨ үтүөлээх бырааһа Виктор Игнатьев, о.д.а бааллар. Мемориальнай дуосканы улуус баһылыга Дмитрий Тихонов, Виталий Андросов чугас доҕоро Михаил Лебедев уонна бииргэ төрөөбүт балта, РФ уонна СӨ үтүөлээх бырааһа Людмила Оконешникова арыйдылар.

Салгыы Р.Г.Васильев аатынан улуустааҕы кыраайы үөрэтэр түмэлгэ «Талба талаан маанылааҕа» быыстапка, Виталий Тимофеевичка аналлаах анал истиэндэ арылыннылар. Быыстапка арыллыытынан мустубут дьону Ил Түмэн Судаарыстыбаннай Мунньаҕын вице-спикерэ Александр Жирков эҕэрдэлээн дириҥ ис хоһоонноох этиини оҥордо. Кини Виталий Андросов аатын үйэтитиигэ үлэлэспит уонна «Андросов FEST» бэстибээли тэрийсибит Майатааҕы оҕо ускуустубатын преподавателигэр, СӨ култууратын үтүөлээх үлэһитигэр Дмитрий Санниковка, улуустааҕы кыраайы үөрэтэр түмэл мэтэдьииһигэр Александр Эверстовка, улуус култуураҕа уонна духуобунай сайдыыга салалтатын иһитиннэрэр-мэтэдьиичэскэй киинин салайааччытыгар, СӨ култууратын туйгунугар Галия Сосинаҕа Ил Түмэн вице-спикерин Махтал суруктарын туттарда.

«Доруобуйа» түһүмэҕэр Майатааҕы киин поликлиника аактабай саалатыгар Мэҥэ Хаҥаласка доруобуйа харыстабылын инники сайдыытыгар аналлаах стратегическэй сиэссийэ ыытылынна. Манна доруобуйа харыстабылын эйгэтигэр үлэлиир Дьокуускайтан кэлбит биир дойдулаахтарбыт уонна улууспут киин балыыһатын үлэһиттэрэ, бэтэрээннэрэ кэскиллээх инники соруктар тула аһаҕас кэпсэтиигэ кытыннылар. Сиэссийэ үлэтигэр Виталий Тимофеевич бииргэ төрөөбүт балта, 1 N-дээх Өрөспүүбүлүкэтээҕи балыыһа неврологическай сулууспатын салайааччыта, РФ уонна СӨ үтүөлээх бырааһа Людмила Оконешникова, төрөппүт уола, 2 N-дээх Өрөспүүбүлүкэтээҕи балыыһа реанимацияҕа салаатын сэбиэдиссэйэ Дмитрий Андросов, чугас доҕоро, СӨ үтүөлээх бырааһа, мэдиссиинэ билимин дуоктара, профессор, ХИФУ Мединститутун уопсай хирургияҕа кафедратын сэбиэдиссэйэ Виктор Игнатьев, мэдиссиинэ билимин хандьыдаата, ХИФУ Мединститутун анестезиологияҕа кафедратын сэбиэдиссэйэ, СӨ доруобуйа харыстабылыгар үтүөлээх үлэһитэ Леонид Апросимов, 2 N-дээх Өрөспүүбүлүкэтээҕи балыыһа хирургияҕа кылаабынай бырааһын солбуйааччыта Николай Сидоров, СГУ-гар бииргэ үөрэммит үөлээннээхтэрэ, биир идэлээхтэрэ кыттан көрсүһүү истиҥник ааста.

«Үөрэҕирии» түһүмэххэ Хомсомуол болуоссатыгар «Бастакылар хамсааһыннарын» актыбыыстарынан суһал көмөнү оҥорууга оҕолорго аналлаах маастар-кылаас тэрилиннэ. Биир сэргэх, интэриэһинэй тэрээһининэн «Уопсастыба» түһүмэххэ Р.Г.Васильев аатынан улуустааҕы кыраайы үөрэтэр түмэлгэ СӨ култууратын үтүөлээх үлэһитэ Саргылаана Адамова‒Алтан Кыыс салайан ыыппыт Виталий Андросов олоҕун, айар үлэтин туһунан ахтыы киэһэтэ буолла. Ол туһунан сиһилии кэлин сырдатыахпыт. «Уопсастыба» түһүмэх чэрчитинэн Хомсомуол болуоссатыгар СӨ Ил Түмэнин дьокутааттара Андрей Находкин, Захар Никитин ыыппыт Уопсастыбаннай приемнайдарыгар элбэх киһи кытынна. И.М.Сосин аатынан улуустааҕы киин бибилэтиэкэ үлэһиттэрэ бэйэлэрэ айбыт остуол оонньууларын дьоҥҥо-сэргэҕэ билиһиннэрдилэр, үөрэттилэр.

Түһүмэхтэртэн үгүс тэрээһиннэрдээҕинэн «Айар үлэ» хайысхата буолла. Күн иккис аҥаарыгар Хомсомуол болуоссатыгар бэстибээл тосхолунан норуот күүлэйэ тэриллэн үгүс киһи тоҕуоруһа муһунна. Көлүөнэттэн көлүөнэҕэ салҕанан эдэр-эмэн дьон уоһуттан түһэрбэккэ ыллыыр Иван Федосеев тылыгар Виталий Андросов дьүрүлүгэр «Туундара» диэн ырыаҕа флешмоб тэрилиннэ. М.К.Попова аатынан Майатааҕы оҕо ускуустубатын оскуолатын дириэктэрэ, СӨ култууратын үтүөлээх үлэһитэ Василий Захаров салалтатынан, аккомпанитор Даниил Алексеев доҕуһуолунан тас дойдуларга тиийэ ылламмыт, биһирэммит ырыа бу бэлиэ күн уратытык дуорайда. Биир сонун тэрээһининэн живопись эйгэтигэр дьону сыһыаран М.К.Попова аатынан Майатааҕы оҕо ускуустубатын оскуолатын художественнай кылааһын уһуйааччылара ‒ СӨ култууратын туйгуннара Анастасия Константинова, Александр Необутов аһаҕас халлаан анныгар акварель кыраасканан уруһуйдуурга маастар-кылаастара буолла.

Бу түһүмэххэ улууспут уран тарбахтаахтарын «Мэҥэ Уус» быыстапка-дьаарбаҥката, талба талааннаах маастардарбыт төлөбүрдээх маастар-кылаастара тэрилиннэ. Лидия Николаева валяниеҕа, «Уран Майа» жабо тигиитигэр, саха таҥаһын киэбин оҥорууга, «Кэрэ иис» айар түмсүү күлүүс угар иһит оҥоруутугар, Лена Лукина быысапкаҕа, Мария Сивцева кыл-сиэл өрүүтүгэр, Татьяна Неустроева алтан симэхтэргэ, Римма Егорова иһигэр чэйдээх кэмпиэт оҥоруутугар, Нарыйа Иванова гиипсэттэн оҥоһуктарга, Туйаара Егорова туостан хартыыналарга үлэлэрин кистэлэҥнэрин, албастарын үллэһиннилэр.

Бэстибээл түмүктүүр тэрээһиниэн Д.Ф.Ходулов аатынан норуот айымньытын дьиэтигэр өрөспүүбүлүкэбит ускуустубатын маастардара, эстрада ырыаһыттара, улууспут айар куттаах ырыаһыттара, бөлөхтөрө, «Кыталык» ансаамбыл кыттыылаах «Алааһым арылы кустуга» бырааһынньыктааҕы улахан кэнсиэр буолла. СӨ култууратын үтүөлээх үлэһитэ, «Душа России» Бүтүн Арассыйатааҕы, Саха Хомсомуолун бириэмийэлэрин лауреата Василий Винокуров‒Кыталык Баһылай туруоруутунан ырыа дьоро киэһэтэ көрөөччүгэ умнуллубат өйдөбүлү хаалларан үрдүк таһымҥа ааста. Бу күн бэстибээл иитинэн барыта 18 тэрээһин ыытылынна.

Виталий Андросов чаҕылхай олоҕо, киэҥ ыырдаах үлэтэ-хамнаһа умнуллубат, айбыт ырыалара саха норуотугар мэлдьи чугастар, өлбөт-сүппэт үйэлээхтэр.

Алена ДОКТОРОВА.