Алтынньы 23 күнүгэр И.Г.Игнатьев аатынан Харатааҕы спортивнай орто оскуола саалатыгар улуустааҕы үөрэҕирии отдела уонна Харатааҕы “Кэрэчээн” уһуйаан тэрийиитинэн улуус уһуйааннарын кустовой холбоһуктарын икки ардыларыгар кыайыылаахтарын икки ардынааҕы “Аҕам, ийэм, мин – успуорду өрө тутар дьиэ кэргэн” күрэхтэһии буолан ааста.
Сүрүн сыала – дьиэ кэргэн чөл туруктаах буоларыгар уһуйуу, успуорду көҕүлээһин. Кустовой мэтэдиичэскэй холбоһуктартан 8 хамаанда кэлэн күөн көрүстэ. А.А.Пахомов аатынан Тиэлиги оскуола-саадыттан Гаврильевтар, Аллараа Бэстээх “Сказка” ‒ Ивановтар, Бүтэйдээх “Чэчир” оҕону сайыннарар киинтэн Титовтар, Маттатааҕы “Ньургуһун” ‒ Кычкиннар, Харатааҕы “Кэрэчээн” ‒ Бурцевтар, Н.В.Петров аатынан Дьабыл ‒ Дьяконовтар, Н.Д.Неустроев аатынан Бэдьимэ ‒ Сергучевтар, Майатааҕы “Сардаана” оҕону сайыннарар киинтэн Гоголевтар дьиэ кэргэн кыттыыны ыллылар.
Күрэхтэһии 8 көрүҥүнэн ыытылынна: бэйэни билиһиннэрии, уһуну ыстаныы, аҕалар сиртэн тирэнэн анньыныылара, оҕо уонна ийэ пресс хачайдааһына, сыалы таба быраҕыы, ыскакаалканан ыстаныы, боппуруостарга эппиэттээһин, эстэпиэтэ.
Дьүүллүүр сүбэҕэ оҕо-ыччат успуордун оскуолатын дириэктэрин үөрэх чааһын солбуйааччыта, оҕунан ытыы тириэньэрэ Айталы Артамонова, “Мэнэ кэскилэ” патриотическай иитии координационнай киинин бэрэстэбиитэлэ, улуустааҕы “Движение первых” хамсааһын исписэлиистэрэ Александра Софронова, Сахаяна Сидорова үлэлэстилэр.
Тыҥааһыннаах киирсии түмүгүнэн бастакы миэстэни Аллараа Бэстээхтээҕи “Сказка” оҕо саадыттан Ивановтар ылары ситистилэр. Иккис миэстэни Майатааҕы “Сардаана” оҕону сайыннарар кииниттэн Гоголевтар ыллылар, үһүс Н.В.Петров аатынан Дьабыл оскуола-саадыттан Дьяконовтар дьиэ кэргэн буоллулар. Кыттыбыт дьиэ кэргэн бары сэртипикээттэринэн уонна өйдөбүнньүк бэлэҕинэн наҕараадаланнылар. “Мэҥэ кэскилэ” патриотическай иитиигэ тирэх киин, “Навигаторы детства” федеральнай бырайыак муниципальнай исписэлиистэрэ кыайыылаахтарга бэлэхтэри туттардылар.
Кыайбыт хамаанда ахсынньы 13 күнүгэр өрөспүүбүлүкэтээҕи күрэхтэһиигэ улууспут чиэһин көмүскүү киириэхтэрэ. Ивановтар дьиэ кэргэҥҥэ ситиһиини, кыайыыны-хотууну баҕарабыт!
Мария Тастыгина
