Кулун тутар 24-26 күннэригэр улуус оскуолаларын 8 кылааһын уолаттарыгар үс хонуктаах учебнай-полевой түмсүүлэр буолан аастылар.
Улуу Кыайыы 80 сылынан, Аҕа дойдуну көмүскээччи сылынан улуус үөрэҕириитин ситимин сүрүн тэрээһиннэрин былаанын чэрчитигэр киирэр патриотическай тэрээһин уонна уол оҕону туһаайан иитэр суолталаах ыытылыннылар.
Улуус бары оскуолаларын кустовой-методическай холбоһуктарынан бөлөхтөргө арааран 5 оскуолаҕа тэрилиннилэр. Ол курдук Майа В.П. Ларионов аатынан (дириэктэр П.В.Васильев), М.Е.Попов аатынан Аллараа Бэстээх (Ф.А.Стручков), Төҥүлү (С.Н.Десяткин), Наахара (П.В.Старостин) орто оскуолаларыгар уонна Хара орто спортивнай оскуолатыгар (А.А.Оконешников) барыта 116 үөрэнээччи кыттыылаах үрдүк таһымҥа ыытылыннылар.
Ахсыс кылаас уолаттара быйылгы үөрэх сылыттан саҥа киирбит “Основы безопасности и защиты Родины” биридимиэт федеральнай бырагырааматынан “Основы воинской службы” түһүмэх практическай чааһын уонна байыаннай дьыала бастакы сатабылларын үөрэҕин үс күн устата аастылар. Ону таһынан юнармеецтар “Эр санаа” уруоктарыгар, бойобуой дьайыылар бэтэрээннэрин кытта көрсүһүүлэргэ, устуоруйа лиэксийэлэригэр уо.д.а. дойдуга бэриниилээх буолууга туһаайыллар тэрээһиннэргэ кыттыыны ыллылар. Бары түмсүү кыттыылаахтарын интэриэстэрин тардыбыт дьарыктарынан пилота суох көтөр аппараттары (БПЛА) үөрэтии, спортивнай ориентирование, суһал медицинскэй көмөнү оҥоруу дьарыктара, байыаннай-спортивнай оонньуулар уонна эт-хаан өттүнэн кыахтаах буолуу нормативтарын туттарыы буоллулар.
Үс хонуктаах сбордар түмүктэринэн хас биирдии үөрэнээччигэ учебнай-полевовй сбору ааспытын туоһулуур зачетнай киниискэлэр, бастыҥ юнармеецтарга грамоталар уонна байыаннай-спортивнай оонньуулар кыайыылаахтарыгар дипломнар туттарылыннылар. Уолаттар элбэх саҥаны билэн, сатабыллары баһылаан, биир саастыылаахтарын кытта алтыһан, саҥа элбэх табаарыстанан тарҕастылар.
Тэрээһин ыытыллар оскуолаларыгар учебнай-полевой түмсүү эйгэтэ: оҕолор хонор, аһыыр, үөрэнэр уонна дьарыктанар усулуобуйалара сөптөөхтүк тэрилиннэ. ОБЗР, физкултуура уонна иитэр үлэ педагогтара биир хамаанда буолан, айымньылаах, кыһамньылаах уонна бэриниилээх үлэлэрин түмүгэр улуустааҕы үс күннээх учебнай-полевой түмсүүлэр үрдүк таһымҥы ыытылыннылар.
Николай Тарасов, улуустааҕы үөрэх управлениетын исписэлииһэ
