Хаптаҕай нэһилиэгин кыраайы үөрэтээччилэрин түмсүүтэ бэҕэһээ, алтынньы ый 20 күнүгэр, улуус баһылыгын Дмитрий Тихоновы кытта тус көрсүһүүгэ сырыттыбыт.
Көрсүһүү 15.50 чааска торумнаммыт этэ уонна ол этиллибит кэмигэр туох да кэтэһиннэриитэ суох чопчу саҕаланна. Көрсүһүүгэ биһиги өттүбүтүттэн билигин үлэлии сылдьар бырайыакпытын баһылыкпытыгар сиһилии кэпсээн, кини өйөбүлүн ылар баҕалаах этибит. Эрдэттэн бэлэмнээбит быһаарыы сурукпутун ааҕан, бырайыак ис хоһоонун көрдөрөр табылыыссаларбытын болҕомтолоохтук көрөн, Хаптаҕай түмэлэ уонна түмсүү салайааччыта Мария Слободчикова кэпсээнин истэн баран, бырайыагы сүнньүнэн өйүүрүн таһынан, кэккэ сүбэлэри этэн биһигини кынаттаата.
Бырайыак барылынан Хаптаҕайга үс салаалаах (музееполис, тимир уустара, иис-уус) историко-культурологическай киин тэриллэрин былааннаабыппыт. Иитиэхтэнэн сылдьыбыт баҕа санаа бастакы тэрээһининэн Тамматааҕы тимири уһаарар собуот 290 сыллаах үбүлүөйүн “Өбүгэлэргэ сүгүрүйүү” диэн ааттанан ыытыллыбыта.
Дмитрий Тихонов туохха барытыгар төрдүттэн ырыта ылсыһарын Кыайыы 80 сылын көрсө Майаҕа Кыайыы болуоссатын саҥардан, тупсаран оҥорторо сылдьарныттан, сахалартан бастакы Сэбиэскэй Сойуус Дьоруойун Федор Попов пааматынньыгын туруорсан туруортарбытыттан, Аҕа дойдуну көмүскүүр сэриигэ улуус 31 нэһилиэгин кыттыылаахтарын барыларын чуолкайдатан, элбэх буойун аатын тилиннэртэрэн, дьоһуннаах 34 кинигэни таһаартарбытыттан сөҕө-махтайа көрөбүт. Ол курдук, биһиги нэһилиэкпит олохтоохторун баҕа санаалара туоларыгар болҕомтолоохтук, өйөбүллээхтик сыһыаннаспыта салайааччыулууһун сайдыытын өрө тутарын көрдөрөр. Инники өттүгэр да тэрээһин үлэтин бары хайысхаларыгар бииргэ үлэлэһиэхпит диэн буолла.
Зинаида Игнатьева