Ахсынньы 18 күнүгэр улуус баһылыгын отчуота Дойду нэһилиэттэн саҕаланна. Н.Н.Кычкин аатынан элбэх хайысхалаах култуура киинигэр буолбут отчуокка 29 олохтоох муһунна. Дмитрий Тихонов 2024 сылга ыытыллыбыт үлэни сиһилии билиһиннэрдэ.
Отчуоттуур мунньаҕы нэһилиэк баһылыга Олег Кычкин арыйан, дьонун-сэргэтин көхтөөх кэпсэтиигэ ыҥырда.
Олохтоохтор нэһилиэккэ үлэлии кэлэр дьоҥҥо саҥа уопсай дьиэ тутуллара, нэһилиэккэ киирэр суол оҥоһуллара, кэлэр сылга салгыы ититии ситимэ тардыллара наадатын эттилэр. Уопсай дьиэлэргэ толору хааччыллыы киирэрин, ынах ыларга субсидияҕа, үүтү туттарыы саҥа сокуоннарыгар, хаарбах дьиэттэн көһөрүү бырагыраамаҕа, сайыҥҥы лааҕыр үлэтигэр ханнык көмө баарын ыйыталастылар.
Улуус дьокутааттарын сэбиэтин бэрэссэдээтэлэ Иннокентий Андросов нэһилиэккэ тыа хаһаайыстыбатын өрө көтөҕүөххэ диэн эттэ.
СӨ Ил Түмэн Судаарыстыбаннай Мунньах сир сыһыаннаһыыларыгар, айылҕа ресурсаларыгар уонна экологияҕа сис кэмитиэтин бэрэссэдээтэлэ Андрей Находкин улуус бары дьонун долгутар «КлиКра сокуонун» туһунан сиһилии кэпсээтэ.
Дмитрий Тихонов Дойду олохтоохторугар анал байыаннай дьайыыга сылдьар биир дойдулаахтарбытыгар күүс-көмө буолалларыгар махтал тылларын эттэ.
Иван Лукин.
