Улуус баһылыгын 2024 сыллаах үлэтин 16-с төгүллээх отчуота ахсынньы 17 күнүгэр Бүтэйдээх, Өлөчөй кэннилэриттэн Тараҕай нэһилиэгинэн түмүктэннэ. Отчуоттуур састаап бөлөҕүн Дмитрий Тихонов бэйэтэ билиһиннэрдэ. Манна Ил Түмэн дьокутааттара Андрей Находкин, Захар Никитин, улуус сэбиэтин бэрэссэдээтэлэ Иннокентий Андросов, управлениелар, тэрилтэлэр салайааччылара кыттыыны ыллылар.
Отчуоту истэ 140 киһи кэлбит. Манна улууспут сайдыытыгар төһүү күүс буолуохтаах оскуола улахан кылааһын оҕолоро кэлбиттэрэ кэрэхсэнэр. Үүнэр көлүөнэ ыччаппыт улууска туох-ханнык үлэлэр ыытыллалларын, туох кыһалҕалар баалларын бэйэлэринэн көрөн-истэн олох киэҥ аартыгар үктэнэллэригэр, сөптөөх идэни талалларыгар бу көдьүүстээх буолуоҕа. Бу баһылык Юрий Порядин инникини көрөр салайааччы буоларын туоһута диэн Дмитрий Иванович сыаналаата. Маны сэргэ, бэйэлэрин дьоһун олохторунан холобур буолар 89 саастаах тыыл бэтэрээнэ Николай Иванович Иванов, улуус бочуоттаах олохтооҕо, ытык саастаах Александр Никитич Аргунов кэлбиттэр.
Дьон долгуйар ыйытыктарын: военкомат үлэһиттэрэ отчуокка сылдьыһыахтара дуо, 3 сылтан уһун болдьоххо сатаан туһаныллыбатах оттуур сир, уһаайба былдьанар дуо, чааһынай киһи күрүө оҥосторугар туох көмө баарый, үүт харчыта тоҕо хойутаабытын, каадыр боппуруоһун, о.д.а. биэрдилэр.
Ветсулууспа бэтэрээнэ Павел Слепцов сүөһү иитиитигэр бэриллэр көмө харчы туохха бэриллэрэ ордугуй, үлэттэн тохтоотоххо биэнсийэ эбиллэр дуо, педагогическай үлэ бэтэрээнэ Дмитрий Слепцов гражданскай оборона диэн билигин баар дуо, куттал суох буолуутугар туох үлэ барарый, оскуолаттан Мария Елисеева элбэх оҕолоохторго Аллараа Бэстээххэ бэриллэр уһаайба туһунан, тулаайах оҕоҕо 18-н туоллаҕына дьиэ бэриллэр дуо, 2025 сылга оскуола оҕотугар итии аһылыкка туох көмө баарый, Егор Винокуров Табаҕа-Майа икки ардыгар баар синньээбит суол сиҥнэрин өрөмүөннээһиҥҥэ, анал байыаннай дьайыы кыттыылааҕын аймаҕа Мария Степанова байыаннай юрист баар дуо, култуура киинин дириэктэрэ Елена Бурнашева улуус баһылыгын харыйатыгар оскуола ситиһиилээх оҕотугар кубуота тоҕо суоҕун, о.д.а. ыйытыылар, этиилэр киирдилэр. Киирбит ыйытыктарга туһааннаах салайааччылар толору хоруйдары биэрдилэр, сорох боппуруостары сирэй көрсөн быһаарыстылар.
СӨ култууратын үтүөлээх үлэһитэ Павел Егоров “Маннык сиһилии отчуоту саҥа иһиттим. Дмитрий Иванович саҥа үчүгэй хамсааһыннары таһаарда, чөл олоххо, успуорка, өбүгэ үгэстэрин ыччакка тиэрдиигэ – барытыгар бэйэтинэн холобур буолар” — диэн бэлиэтээн эттэ итиэннэ үлэни үчүгэйинэн сыаналаата.
Ааспыт сылга олохтоохтор 5, ол иһиттэн тутууга сыһыаннаах боппуруостары туруорсубуттарыттан 3 үлэҕэ сылдьарын, биир туолбатаҕын, биир туолбутун, кулууп уонна оскуола тутулларын туруорсалларыттан оскуола тутуута бастакы миэстэҕэ уочаракка баарын Дмитрий Тихонов эттэ. “Якутнацпродукт” ТХПК салайааччыларын Дмитрий, Роман Герасимовтары дойдуларыгар элбэх үлэ миэстэтин таһааран үлэлии-хамсыы сылдьалларын холобур оҥоһунна, маннык дьоммутун өйүүргэ ыҥырда, нэһилиэк хас биирдии ыала анал байыаннай дьайыыга сылдьар уолаттарга барар көмөҕө көхтөөх кыттыыларын иһин улаханнык махтанна.
Түмүккэ, нэһилиэк баһылыга Юрий Порядин 120 миэстэлээх саҥа ирдэбиллэргэ толору эппиэттиир оскуола, култуура киинэ, балыыһа тутуллуутун, “Суһал көмө” массыынаны туруорсалларын, Чэлгиэннээххэ саҥа кыбаарталга уотун, гааһын киллэртэрэргэ, Табаҕа ортотунан ааһар айан суолун аспааллыырга эбэтэр бетон билиитэлэринэн бүрүйэргэ, Араҥас пиэрмэтигэр барар суол-иис оҥоруутугар күүс-көмө көрдүүллэрин этэн туран улуус баһылыгар боротокуолу туттарда.
Норуот дьокутаата Андрей Находкин дойдубут таһымыгар киириэхтээх олохтоох бэйэни салайыныыга туһуламмыт “КлиКра сокуонун” барылын туһунан итиэннэ тыа хаһаайыстыбатын боппуруостарыгар тус санаатын эттэ. Захар Никитин дьокутаат быһыытынан үлэтин-хамнаһын сырдатта.
Нэһилиэк олохтоохторо улууска ыытыллар үлэни-хамнаһы биһирииллэрин биллэрдилэр.
Марелла Баишева.
