Муус устар 17 күнүгэр Майаҕа Улуу Кыайыы 80 сылыгар ананар “Улуу Кыайыынан кынаттанан, эйэлээх олоҕу тутуоҕуҥ!” улуустааҕы научнай-практическай кэмпириэнсийэ 5-11 кылаас үөрэнээччилэригэр буолан ааста.
Аҕа дойду Улуу сэриитин кыттыылаахтарын, тыыл уонна үлэ бэтэрээннэрин үйэтитэр сыаллаах патриотическай тэрээһини Мэҥэ Хаҥалас үөрэҕириитин салалтата, Р.Г.Васильев аатынан кыраайы үөрэтэр түмэлэ быйыл үһүс төгүлүн тэрийэн ыыттыбыт. Кыттааччы оҕолор Аҕа дойду Улуу сэриитин уонна тыылга Кыайыыны уһансыбыт бэтэрээннэр бойобуой, килбиэннээх суолларын, дьоһун олохторун чинчийэн-үөрэтэн дакылаат оҥорон, ытык дьоммут сырдык ааттарын үйэтитиигэ ананар бырайыактарын кэпсээтилэр. Барыта 103 үөрэнээччи 24 оскуолаттан 4 сиэксийэнэн кытыннылар.
Кэмпириэнсийэ аһыллыытыгар Улуу Кыайыы үйэлэргэ сүппэт, Аҕа дойду Улуу сэриитин кырдьыктаах устуоруйата көлүөнэттэн көлүөнэҕэ суолтатын бэлиэтээн улуус үөрэҕириитин начаалынньыгын солбуйааччыта М.В.Петров, улуустааҕы бэтэрээннэр сэбиэттэрин бэрэссэдээтэлэ Е.С.Решетникова тыл этэн эҕэрдэлээтилэр. Үөрүүлээх аһыллыы долгутуулаах түгэнинэн үлэ бэтэрээнэ, мелодист Дмитрий Егоров “Бэтэрээн убайбар” авторскай ырыатын толоруута, ырыа Улуу Кыайыы 50 сылыгар ананан үгүс сэрии бэтэрээннэрэ баар эрдэхтэринэ ылламмыт устуоруйатын билиһиннэрии буолла.
Кэмпириэнсийэ эспиэрдэрин улуустааҕы кыраайы үөрэтэр түмэл научнай үлэһитэ А.В.Эверстов салайда. Улуус бэтэрээннэрин сэбиэтин бэрэссэдээтэлэ Е.С.Решетникова, үлэ бэтэрээннэрэ Т.И.Артемьева, Н.И.Никонорова, А.И.Петрова, У.С.Шишигина; улуустааҕы эбии үөрэхтээһин кииннэрин мэтэдьиистэр Л.И.Филиппова, Л.П.Маркова, улуустааҕы киин бибилэтиэкэттэн Н.М.Винокурова, улуустааҕы үөрэх салалтатыттан Н.П.Тарасов үлэлэстилэр, үөрэнээччилэр дакылааттарын сыаналаатылар уонна бастыҥ үлэлээхтэри быһаардылар. Улуустааҕы кэмпириэнсийэ лауреаттара, I, II, III истиэпэннээх дипломаннара грамоталарынан, анал мэтээллэринэн, кыттыбыт оҕолор Махтал суруктарынан бэлиэтэннилэр.
“Аҕа дойду Улуу сэриитэ” сиэксийэҕэ (5-7 кылаастарга) Наахара орто оскуолатын 5 кылааһын үөрэнээччитэ Павлик Семенов (салайааччы В.И.Соловьева) “Хос эһэм Семенов Иннокентий Петрович бойобуой сырыытын иһин ылбыт наҕараадалара” уонна Аллараа Бэстээх 2 №-дээх орто оскуолатын 7 кылааһын үөрэнээччитэ Амелия Птицына (О.О.Феофанова) “Мин эһэм Давлюд А.А. – партизан” дакылааттарынан лауреат аатын сүктүлэр. 8-11 кылаастарга Төхтүртэн Алгыс Попов (9 кылаас, Д.Е.Тарабукина) “Мин хос эһэм, Аҕа дойду Улуу сэриитин бэтэрээнэ – Бытыкиннар уустарыттан” лауреат буолары ситистэ.
“Кыайыыны тыылга уһансыбыттара” сиэксийэҕэ Мооруктан Галя Попова (9 кылаас, Т.Д.Егорова) “Сэрии сылларыгар Моорук нэһилиэгин олохтоохторун хоргуйуулара”, “Үйэлэргэ умнуллубат” сиэксийэҕэ В.П.Ларионов аатынан Майа оскуолатыттан Рустам Кривошапкин (8 кылаас, Н.Г.Черкашина) “Майа сэлиэнньэтиттэн 1941 сыллаахха бастакы хомуурга барбыт сэрииһиттэр бойобуой суоллара”, Баатараттан Георгий Новиков (10 кылаас, А.П.Жиркова) “Кыайыы Аал Луук маһа” дакылааттарынан лауреат буоллулар.
Улуу Кыайыы суолтатын үрдэтэр, Аҕа дойду Улуу сэриитин уонна тыыл бэтэрээннэрин үйэтитиигэ, үүнэр көлүөнэ Ытык Дьоммутугар махталлаах буолан иитиллэн тахсалларыгар туһаайыллан 2023, 2024 сылларга ыытыллыбыт улууспут үөрэнээччилэрин чинчийэр үлэлэринэн ыытыллыбыт ааҕыылар түмүктэринэн 50-ча альбом-рапорт уонна быйылгы Кыайыы 80 сылыгар ананар научнай-практическай кэмпириэнсийэҕэ ааҕыллыбыт 91 дакылаат тезистэрэ Р.Г.Васильев аатынан Мэҥэ Хаҥаластааҕы кыраайы үөрэтэр түмэл пуондатыгар туттарылыннылар.
Ким да умнуллубат, туох да умнуллубат! Улуу Кыайыыны уһансыбыт Ытык көлүөнэ дьоммутугар СҮГҮРҮЙЭБИТ! МАХТАНАБЫТ!
Николай Тарасов, улуус үөрэҕириитин салалтатын исписэлииһэ, кэмпириэнсийэни тэрийээччи.
