Ахсынньы 23 күнүгэр Мэҥэ Хаҥалас улууһун баһылыгын 2024 сыллааҕы үлэтин отчуота Нөөрүктээйи нэһилиэгиттэн саҕаланна.
Манна Ил Түмэн дьокутаата Андрей Находкин, улуус сэбиэтин бэрэссэдээтэлэ Иннокентий Андросов, управлениелар, тэрилтэлэр салайааччылара кыттыыны ыллылар.
Отчуот мунньаҕын олохтоох баһылык Николай Федоров иилээтэ-саҕалаата. Кини улуус дьаһалтатын кытта күннэтэ билсэн, туруорсан үлэлииллэрин, быйылгы сылга араас таһымнаах бырагыраамаларга, бырайыактарга ситиһиилээхтик кыттан, бүддьүөттэригэр элбэх үбү киллэрбиттэригэр улуус баһылыгар махтанна.
Улуус баһылыга Дмитрий Тихонов Москва куоракка “Бастыҥ тиэргэн” Бүтүн Арассыыйатааҕы дьиэ таһынааҕы сири-уоту тупсарыы бырайыактарын куонкуруһугар ситиһиилээхтик кыттыбыт Сандаара Поповаҕа Махтал суругун, бэлэҕин итиэннэ улууспут талааннаах дьонун өйөөн, баай култуурабытын тарҕатааччы Евдокия Неустроева салайааччылаах “Сыахай” түмсүүгэ харчынан Туоһу суругу үөрүүлээх быһыыга-майгыга туттарда. Бу кэннэ кэлиҥҥи 3 сылы тэҥнии тутан 2024 с. үлэтин сүрүн көрдөрүүлэрин отчуотун слайданан көрдөрөн, сиһилии быһааран сырдатта.
Олохтоохтортон элбэх ыйытык суругунан киирдэ, ону сэргэ, култуура киинин дириэктэрэ Марфа Дмитриева, бочуоттаах сынньалаҥҥа олорор Гаврил Осипов, “Лена” оҕо уһуйаанын дириэктэрэ Маргарита Шарина ыйытыктарынан, этиилэринэн кытыннылар.
Манна Чыамайыкы сиригэр сир баайын хостооһунун туһунан, хаарбах дьиэттэн көһөрүү салгыы үлэлиир дуо, өрүһү туоруурга, биэрэги бөҕөргөтүүгэ туох дьаһал ылыллар, Иванов уулуссатыгар турар 10-с нүөмэрдээх дьиэҕэ хапытаалынай өрөмүөн ыытыллыа дуо, метан сапараапката хаһан арылларын, бөҕү таһар тэрилтэ үлэтин, о.д.а. ыйытыктары биэрдилэр.
Ханна да буоларын курдук, олохтоохтору тыа хаһаайыстыбатын, доруобуйа харыстабылын итиэннэ үөрэҕирии эйгэтин боппуруостара ордук долгуталлар. Ол курдук, холкуостааһын, оҕуруот аһын киэҥник олордуу тоҕо кыаллыбатын, диализ киинэ ханна арыллыай, МРТ аппараат үлэлиир дуо, уһуйааҥҥа кэлэр сылга өрөмүөн үлэтин үбүлээһинигэр көмө, толору хааччыллыы киириэн наадатын, “Оҕо үүтэ” бырайыак салгыы үлэлиэ дуо, лиидэр оҕолору кытта үлэлэһэр бырайыагы, о.д.а. ыйытыктары уонна этиилэри киллэрдилэр. Манна туһааннаах салайааччылар толору хоруйдаан, эппиэттэри биэрдилэр.
“Лена” оҕо уһуйаанын сэбиэдиссэйэ Маргарита Шарина: “Аныгылыы сиэринэн ыытыллыбыт отчуот наһаа үчүгэй буолла, ааспыт сылга элбэх үлэ барда диэн бэлиэтиэхпин баҕарабын. Дмитрий Иванович үлэлиэҕиттэн ыла улууска эр дьон хамсааһыннарын таһааран, эр дьон түмсүүлэрин тэрийэн, ыччаты түмэн элбэх үлэ барда уонна барар. Үөрэх эйгэтигэр улахан күүс-көмө буолла. Үөрэх салайааччыларын кытта биир ситимнээхтик үлэлээн, элбэхтик көрсүһэн, биһиги туох кыһалҕалаахпытын ыйыталаһан, үчүгэй үлэлээх үөрэх тэрилтэлэригэр сыл түмүгүнэн улуус баһылыгын гранын олохтообута биһигини үөрдэр. Бу үөрэх хаачыстыбата тупсарыгар, оҕо эргиччи сайдан тахсарыгар улахан стимул буолар. Быйылгы сыл түмүгүнэн уҺуйааммытыгар грант ыллыбыт, бу улахан өйөбүл буоларынан олохтоохтор ааттарыттан махталбытын тиэрдэбин”, — диэтэ.
Ил Түмэн дьокутаата Андрей Находкин дойдубут таһымыгар киириэхтээх олохтоох бэйэни салайыныыга туһуламмыт “КлиКра сокуонун” барылын туһунан этиитигэр боломуочуйабытыгар элбэх үбүлээһин көрүллүө этэ диэн үллэһиннэ итиэннэ бу сокуон кэлэр ааҕыыта кэккэ биричиинэлэринэн 2025 сылга көспүтүн иһитиннэрдэ.
Түмүккэ улуус баһылыга Дмитрий Тихонов ааспыт сыллааҕы отчуокка боротокуолга киирбит 13 боппуруостартан үһэ олоххо киирбитин, атына үлэҕэ сылдьарын сырдатта, анал байыаннай дьайыыга сылдьар уолаттарбытыгар ыытыллар көмөҕө олохтоохтор көхтөөхтүк кытталларыгар махтанна.
Отчуоту 105 киһи кэлэн иһиттэ.
Марелла Баишева.
