Олунньу 18 күнүгэр Майатааҕы «Кэнчээри» уһуйааммытыгар Ийэ тыл уонна сурук-бичик күнүгэр аналлаах сыл аайы ыытыллар Т.О.К. оонньуу бэрт сэргэхтик, сонуннук ааста.
Күрэһи логопед-учуутал Сардана Алексеева, иитээччи Мария Катаева иилээн-саҕалаан ыыттылар. Улахан уонна бэлэмнэнии бөлөхтөртөн биирдии оҕо төрөппүтүн кытта кытынна.
Быйылгы күрэс улууспут оскуола иннинээҕи үөрэхтээһинин 100 сылын бэлиэтээн, Майа сэлиэнньэтигэр «Удьуор утума» сылы көрсө сонуннук тэрилиннэ. Төрөппүттэр саха тылын баайын, тылын-өһүн быһаарыыга суругунан тургутуулары аастылар, уопсай билиини чиҥэтэр ыйытыктарга эппиэттээтилэр. Оҕолор өс хоһооннорун болҕойон олорон истэн ситэрдилэр, таабырыннары таайан билиилэрин чиҥэттилэр.
Салгыы күрэс кыттааччыларыгар сахалыы саҥарар эйгэни кэҥэтэн «Мас-игра» хампаанньа мас оонньууларын көрдөрөн билиһиннэрдибит, оонньоттубут. Бэрт тыҥааһыннаах күрэс буолла. Төрөппүттэр, оҕолор да «дьиэҕэ оонньуохха сөптөөх бэртээхэй оонньуулар эбит» диэн астына бэлиэтээтилэр.
Түмүккэ «Кылаан чыпчаал» ааты «Току-току ньээм-ньээм» бэлэмнэнии бөлөҕүттэн Чаҕыл, Михаил Аркадьевич Самсоновтар ыллылар.
Кыттыбыт бары дьиэ кэргэттэргэ анал ааттар иҥэрилиннилэр: «Мас-игра оонньуу бастыҥнара» ‒ Люба, Юлия Яковлевна Тастыгиннар; «Кыайыыга дьулуурдаах дьиэ кэргэн» ‒ Айтана, Анна Федоровна Кычкиннар; «Уран тылы утумнааччы» ‒ Дьулусхан, Нюргуяна Васильевна Шергиннэр; «Киэҥ билиилээх дьиэ кэргэн» ‒ Илона, Ольга Юристановна Кириллиннэр.
Күрэскэ кыттыбыт оҕолорбутугар уонна төрөппүттэрбитигэр үлэттэн быыс булан кэлэн кыттыыны ылбыттарыгар махтанабыт. Инникитин даҕаны өрүү маннык оҕолоргутун кытта тэбис тэҥҥэ сылдьан араас тэрээһиннэргэ, күрэстэргэ көхтөөхтүк кыттар буолуҥ, ыччаттаргытын кэскиллээххэ көҕүлээн иһиҥ.
Иитээччи Сардана Аввакумова.
