Майаҕа «Дьол түһүлгэтэ» уопсастыбаннай кииҥҥэ Мария Лукина салайааччылаах «Түмэн» уопсастыбаннай холбоһукка байыаннай дьайыыга сылдьар биир дойдулаахтарбытыгар анаан алта хайысханан үлэ ыытылынна. Бу күннэргэ сааскы үлэлэрин үмүрүтээри түбүгүрэллэр.
Евдокия Семенова салайыытынан биир дойдулаахтарбытыгар анаан харысхал сиэккэ өрүүтэ күннэтэ ыытыллан бэс ыйын 29 күнүгэр түмүктэннэ. Манна көмөлөһөр дьон кыптыыйдаах, кырыллар саҥа таҥастаах, өйүөлээх кэлэн графигынан үлэлээтилэр. Кинилэри олохтоох дьаһалта түөлбэлэри кытта үлэҕэ исписэлииһэ Жанна Тумусова сүрүннээн үлэ тэтимнээхтик барда.
Тохсунньу ыйтан саҕалаан бу күҥҥэ диэри уопсайа15 харысхал сиэккэ баайылынна. Байыастарбыт көмүскэллээх, харысхаллаах буоллуннар диэн илиилэрин сылааһын иҥэрэн баайыллыбыт сиэккэлэри «Якутия с тобой» өрөспүүбүлүкэтээҕи ыстаапка илдьэн туттаран иһэллэр. Манна күүс-көмө буолбут түөлбэлэр олохтоохторугар, күннэтэ көмөлөспүт Ариадна Филипповаҕа, Александра Дашееваҕа, Галина Шаринаҕа, биэнсийэ пуондатын үлэһиттэрэ таҥаһынан, бочуоттаах сынньалаҥҥа олорор Валерий Романов харчынан көмөлөспүттэригэр, Юлия Пивоварова салайар лааҕырын оҕолоругар, Матрена Харитонова дьиэ кэргэнигэр, о.д.а. салайааччы махтанар.
Евдокия Петровна байыаннай дьайыы саҕаланыаҕыттан илиитин араарбакка үлэлээн, дьону бэйэтинэн көҕүлээн үлэ тахсыылаахтык барда. Мантан сайын «түмэннэр» нэһилиэктэр олохтоохторун сиэргэ-туомҥа, эмкэ туттарга эмтээх оттору хомуйан хатарарга уонна кыл-сиэл массаастыыр, суунар тэриллэри оҥоророллоругар ыҥыраллар. Маны госпиталларга үлэлиир волонтердар көрдөһүүлэринэн эмтэнэр байыастарга ыытарга былаанныыллар.
Ытыктабыллаах бар дьоммутун бу хамсааһыннарга көхтөөхтүк кыттан сэмэй көмөлөрүн оҥоруохтара диэн эрэнэбит.
Норуот күүһэ ‒ көмүөл күүһэ!
Марелла Баишева.
