Бүгүн, ыам ыйын 3 күнэ, улууспутугар тыа хаһаайыстыбатын салаатыгар сүөһү, сылгы иитиитинэн, ыһыынан дьарыктанар 9 тэрээһиннээх уонна бааһынай хаһаайыстыбаларбытыгар материальнай-тэхиньиичэскэй баазаларын хаҥатыыга биир бэлиэ күн үүннэ. Бу күн кинилэр үөрүүлээх быһыыга-майгыга МТЗ 82.1 мааркалаах балочнай муостаах, норуокка биллэринэн, «Беларус» саҥа тыраахтардар күлүүстэрин Аллараа Бэстээххэ улуус баһылыга Дмитрий Тихонов уонна оройуон Сэбиэтин бэрэссэдээтэлэ Иннокентий Андросов илиилэриттэн туттулар.
Тыраахтардар СӨ норуотун хаһаайыстыбатын үтүөлээх үлэһитэ Руслан Федотов салайар чааһынай тэрилтэтин нөҥүө аҕалылыннылар. Собуоттан «кырыллыбытынан» кэлбит саҥа тыраахтардары «Тумул», «Тарат» ТХПК, «Чүүйэ» МУТ, «М.Егоров», «Томтор», «Хорообут» ХЭТ, «Хаххах» кэпэрэтиип, Андрей Холмогоров, Аркадий Дмитриев салайааччылаах бааһынай хаһаайыстыбалар туттулар.
‒ СӨ Ил Дархана Айсен Николаев өрөспүүбүлүкэҕэ тыа хаһаайыстыбатынан дьарыктанар хаһаайыстыбалары өйүүргэ олохтообут судаарыстыбаннай бырагырааматынан улууспут 9 хаһаайыстыбатыгар чэпчэтиилээх сыананан атыылаһыллыбыт «Беларус» тыраахтардары туттардыбыт. Бу саҥа тиэхиньикэлэри туһанан хаһаайыстыбалар үлэҕэ турунан иннилэригэр турар соруктары толороллоругар бөҕө тирэх буолуохтара диэн эрэнэбит, ‒ диэн бэлиэтээтэ улуус баһылыга Дмитрий Тихонов.
Тыа хаһаайыстыбатыгар олохтоох бородууксуйаны оҥорон таһаарааччылары өйүүр СӨ Ил Дархана Айсен Николаевынан ылыныллыбыт бырагырааманы олоххо киллэриигэ Бырабыыталыстыба, Тыа хаһаайыстыбатын министиэристибэтэ, улуус, нэһилиэк дьаһалталара хаһаайыстыбалар саҥа тиэхиньикэлэринэн хааччыллыыларыгар бары кыттыһан үлэлэһиилэрэ ыһыыга, окко, хомуурга о.д.а үлэлэргэ тыа сирин үлэһит дьонун өйөөһүҥҥэ, ыччаттар үлэлээх буолууларыгар төһүү күүс буоларын туһунан Руслан Федотов санаатын үллэһиннэ. Кини тэрилтэтэ кэлэр нэдиэлэҕэ Амма, Үөһээ Бүлүү улуустарын хаһаайыстыбаларыгар саҥа тиэхиньикэлэри тириэрдээхтээҕин уонна өрөспүүбүлүкэбит атын улуустарыгар маннык үлэ-хамнас салгыы барыахтааҕын иһитиннэрдэ.
Ити курдук, Мэҥэ Хаҥалас улууһун тыа хаһаайыстыбатын тэрээһиннээх уонна бааһынай хаһаайыстыбалара өрөспүүбүлүкэҕэ биир бастакынан саҥа тиэхиньикэнэн хааччыллыылара улууспутугар 2023 ‒ 2025 сс. ыытыллар Тыа хаһаайыстыбатын сылларын тэрээһиннээхтик уонна көдьүүстээхтик ыытыыга улахан күүс-көмө, өйөбүл буолуоҕа.
Алена ДОКТОРОВА.
