Ыам ыйын 29 күнүгэр А.А.Пахомов аатынан Тиэлиги орто оскуолатын “Тобул” интеллектуальнай кулууп иитиллээччилэрэ салайааччыларын Наталия Пахомованы кытары “Рододендрону харыстааҥ” аахсыйаны оҥороннор рододендрон үүнэр тыатыгар, саамай көстүүлээх Тиэлиги мырааныгар баннер ыйаан кэллилэр.
Бу сыл аайы бастакынан силигилиир, сибэккитинэн үөрдэр талах сыллата элбээн иһэрэ үөрдэр, хараҕы сымнатар, нэһилиэкпит биир киэн туттар үүнээйитэ буолар.
“Тобул” кулуупка оскуола үөрэнээччилэрэ олус сөбүлээн дьарыктаналлар, нэһилиэктэрин устуоруйатын, отун-маһын үөрэтэллэр, чинчийэллэр, элбэх кэмпириэнсийэҕэ кыттан ситиһиилэрэ үгүс.
Соторутааҕыта, ыам ыйын 18‒20 күннэригэр, Владивосток куоракка “Рододендрон күннэрэ” ыытыллыбыттара. Онно 20-с төгүлүн Бүтүн Арассыыйатааҕы научнай практическай кэмпириэнсийэ киэҥ эйгэни хабан ыытыллар эбит. Онно кулууп иитиллээччитэ Розанна Сергеева (10 кылаас) “Нэһилиэкпит киэн туттуута ‒ даурскай рододендрон” дакылаатынан кыттан бастакы миэстэни ылары ситистэ. Бу кэмпириэнсийэни Владивосток Ботаническай саада (дириэктэр Павел Крестов) иилээн-саҕалаан ыытар. Кэмпириэнсийэҕэ Саха сириттэн икки оҕо финалга киирэн баран кыттан кэллилэр. Уус Алдантан Анджелина-Айыына Нафанаилова ииристэри чинчийэн үөрэппитин сэргээтилэр, бастакы миэстэни ылан үөрдүбүт-көттүбүт. Кэмпириэнсийэ хабар территорията Крансодартан саҕалаан Сахалиҥҥа тиийэ кыттааччылар бааллар. Научнай ааҕыылартан атын уруһуйга, видеороликка эмиэ күрэстэр ыытыллыбыттар.
Владивосток куорат История пааркатыгар, океанариумҥа рододендрон талахтарын олордон кэллибит. Ботаническай саадка рододендрон араас көрүҥэ үүнэрин сөҕө-махтайа көрдүбүт.
Павел Крестов рододендрон устуоруйатын кэпсээтэ, бу талах урут Владивосток гербэтигэр ойууланара эбитин биллибит уонна поеһынан айаннаан истэххэ Амурскай уобалас суолун кытыыта, тыа быыһа барыта рододендрон талаҕынан кытара олорорун сэргээтибит.
Розанна салайааччытын Наталия Васильевналыын кытта рододендрону чинчийбиттэрэ үһүс сылыгар барда. Бибилэтиэкэҕэ сылдьан элбэх араас матырыйааллары хасыһан үөрэтэллэр. Түгэни туһанан, салайааччыбытыгар улахан махталбытын биллэрэбит.
Нэһилиэк бибилэтиэкэрэ Сардана Сергеева
