«Майа сэлиэнньэтэ» тыа сирин түөлбэтин баһылыга Алексей Неустроев олунньу 4 күнүгэр Улуу Новгород куоракка буолбут «Төрөөбүт түөлбэбит – Арассыыйа күүһэ» («Малая родина – сила России») диэн II Бүтүн Арассыыйатааҕы муниципальнай форумҥа кыттыыны ылла.
Форумҥа Саха сириттэн ыҥырыынан икки баһылык кытынна, иккис кыттыылаах – Горнай улууһун Бэрдьигэстээх нэһилиэгин баһылыга Алексей Аргунов. Бу форум тыа сирин кэлимник сайыннарыы тыын боппуруостарын ырытар, ону тэҥэ дойду олоҕор оруолларын бөҕөргөтөр түһүлгэ буолар.
Тэрээһиҥҥэ бүтүн Арассыыйа араас муннуктарыттан муниципалитеттар баһылыктара үлэ уопутун атастастылар, дьон олороругар табыгастаах усулуобуйаны тэрийиигэ оҥорбут үлэлэрин көрдөрдүлэр уонна олохтоох уопсастыбаннас иннигэр турар кыһалҕалары быһаарарга суоллары ырыттылар.
Форумҥа Майа сэлиэнньэтигэр норуот түмсүүтүнэн, субуотунньугунан олорор түөлбэлэри тупсарыы, икки сыл иһигэр аҥаардас субуотунньугунан 21 уулуссаны, искибиэри оҥоруу үлэлэрин туһунан сырдаттылар. Бу курдук норуот үлэҕэ биир киһи курдук турунуута кэлбит дьон интэриэһин тарта.
