Ыам ыйын 19-23 күннэригэр улуус оскуолаларын 10 кылаас уолаттарыгар 5 күннээх үөрэтэр-полевой көрсүһүү И.М.Романов аатынан Төхтүр орто оскуолатын базатыгар буолан ааста. Быйылгы түмсүү Аҕа дойду Улуу сэриитигэр Кыайыы 80 сылыгар ананан үрдүк таһымҥа ыытылынна.
Улуус 25 орто оскуолаларыттан барыта 153 онус кылаас уолаттара уонна “Основы безопасности и защиты Родины” биридимиэт учууталлара кыттыыны ыллылар. М.Е.Попов аатынан Аллараа Бэстээх орто оскуолатын учуутала, байыаннай эппэрээссийэ кыттыылааҕа, Гаян Харлампьев түмсүү начаалынньыга буолла. Наахара орто оскуолатын учуутала Петр Васильев ыстаап начаалынньыгынан, Ф.Г.Охлопков аатынан Майа оскуолатын учуутала Егор Баишев начаалынньыгы үөрэх чааһыгар солбуйааччынан, Төҥүлү орто оскуолатын учуутала Василий Эверстов начаалынньыгы физбэлэмнэниигэ солбуйааччынан иилээн-саҕалаан ыыттылар. “Килбиэн” улуустааҕы бойобуой дьайыылар бэтэрээннэрин уопсастыбатын чилиэннэрэ, байыаннай дьайыы бэтэрэээннэрэ салайааччы Афанасий Сергеев патриотическай тэрээһин ситиһиилээхтик барарыгар күүс-көмө буоллулар.
Биэс күннээх сборга юнармеецтэр “Основы безопасности и защиты Родины” үөрэх биридимиэтин «Основы воинской службы» түһүмэх практическай чааһын үөрэтиини аастылар. Бырагыраамаҕа Арассыыйа Сэбилэниилээх күүстэрин устаабын, биир кэккэнэн хаамыы, бойобуой тактика, химическэй-бактериологическай сэрии сэбиттэн көмүскэнии, байыаннай топография, бааһырбыкка бастакы медицинскэй көмөнү оҥоруу чаастарын үөрэтии киирэллэр. Уолаттар эт-хаан өттүнэн кыанар буолууларын эрчийии сарсыардааҥы сэрээккэлэринэн, күнүскү эрчиллиилэринэн, нормативтары туттарыыларынан уонна байыаннай-спортивнай күрэхтэһиилэринэн ыытылынна.
Эбии дьарыкка улуустааҕы оҕо-ыччат техническэй киинин үлэһиттэрэ пилота суох көтөр аппараттары (БПЛА) үөрэттилэр уонна хамаанданан күрэхтэһиилэри оҥордулар.
Ыам ыйын 23 күнүгэр «Оҕо аймах сирдьиттэрэ» хамсааһын тэрийиитинэн юнармейскай күрэхтэһиилэр, хамаанданан “Зарница 2.0” оонньуу ыытылынна. Байыаннай түмсүүнү түмүктүүр күнүн тэрээһиннэринэн военизированнай эстэпиэтэ, сарсыарда күн тахсыытын көрсө бойобуой түрүбүөгэ, марш-бросок буоллулар. Киэһээҥи сынньалаҥ бириэмэтигэр оҕолорга викториналар, бэтэрээннэри кытта көрсүһүүлэр, араас сайыннарар оонньуулар ыытылыннылар.
Ыам ыйын 22 күнүн киэһэтигэр түмсүү кыттыылаахтара нэһилиэк олохтоохторугар уус-уран кэнсиэри көрдөрөн көрөөччүлэр биһирэбиллэрин ыллылар. Кэнсиэр оһуокайынан түмүктэннэ. Түмүккэ үөрэнээччилэр бэлэмнэниини ааспыттарын туоһулуур зачетнай киниискэлэри туттулар, бастыҥ юнармеецтэр грамоталарынан, дипломнарынан наҕараадалыннылар.
Үөрэтэр-полевой түмсүү кэрэхсэбиллээх түгэнинэн биир саастыылаах оҕолор бииргэ түмсэн билсиһиилэрэ, биир хамаанда буолан алтыһыылара уонна доҕордоһуулара буолар. Улууспут оскуолаларын 10 кылааһын уолаттара улуустааҕы тургутуулары ситиһиилээхтик ааһаннар, байыаннай дьыалаҕа элбэҕи билэн-көрөн, үгүс табаарыстанан, инникигэ эрэллээх эр санаалаах тарҕастылар.
Николай Тарасов.
