Олунньу 11 күнүгэр Саха Өрөспүүбүлүкэтин Бырабыыталыстыбатын 2024 с. үлэтин отчуота Араҥас нэһилиэгэр туруорулунна.
Үһүс отчуоттуур бөлөҕү СӨ сыанаҕа бэлиитикэтин Судаарыстыбаннай кэмитиэтин бэрэссэдээтэлэ Николай Бочков салайда.
Кинини кытта олохтоохтордуун көрсүһэ Тырааныспар министиэристибэтин уонна суол хаһаайыстыбатын управлениетын департаменын салайааччы Софья Кузьмина, СӨ Үөрэҕириигэ уонна наукаҕа хонтуруоллуур департаменын салайааччы Михаил Колмаков, СӨ ГКУ мониторинг отделын начаалынньыгын солбуйааччы Юрий Маччасынов итиэннэ улууспутуттан баһылыгы тутууга солбуйааччы Василий Филиппов, тыа хаһаайыстыбатын управлениетын салайааччы Иннокентий Семенов, РЭС начаалынньыга Станислав Оконешников, ОДьКХ начаалынньыга Иннокентий Яковлев, кылаабынай быраас солбуйааччыта Наталья Федорова, социальнай көмүскэллээх буолуу кэлим киинин салайааччыта Иван Шестаков, тэрийэр отдел сүрүн исписэлииһэ Иванна Былкова сырыттылар.
Мунньаҕы нэһилиэк баһылыга Андрей Кычкин салайан ыытта. СӨ судаарыстыбаннай былааһын толорор уорганнарын 2024 с. үлэтин-хамнаһын Николай Бочков проекторынан тэҥҥэ кэпсээн, бары хайысхаларынан сыыппараларга олоҕуран сырдатта. Кини бу кэннэ ааспыт сылга тараттар 5 боппуруоһу туруорсубуттарыттан иккитэ туолбутун, иккитэ үлэҕэ сылдьарын, биир кыалла илигин эттэ.
Сүнньүнэн тыа хаһаайыстыбатынан дьарыктанар улуус буоларбытынан олохтоохтору бу боппуруос улаханнык долгутар. Почта отделениетын начаалынньыга Любовь Цыпандина “Бөһүөлэккэ кыһынын олорбот дьон элбэх, “Экосистемы Якутии” тэрилтэҕэ ыспыраапка ыыталлар да, ый аайы төлөбүрдэрэ кэлэ турар, икки сиринэн төлүү олороллоро дьиэ кэргэн бүддьүөтүгэр охсуулаах, маны ким быһаарар?” диэн ыйытта. Педагогическай үлэ бэтэрээнэ Светлана Харитонова тыа хаһаайыстыбатын сайдыытыгар улууспутугар үлэ барар, туох саҥа көрүүлэр баалларый, биир өрөбүлэ суох сарсыарда эрдэттэн хотоҥҥо үлэлиир кэпэрэтиип үлэһиттэригэр үөһэттэн хамнас көрүллэрэ буоллар, УЗИ аппараат улуус иһигэр учаастактааҕы балыыһаларга тоҕо көрүллүбэтий, сахабыт тыла сүтэр турукка киирэн эрэрин хайдах өрүһүйэбит, патриотическай иитиигэ үлэ барыан, онно ирдэбил баар буолуон наада диэтэ. Киирбит ыйытыктарга бөлөх салайааччыта Николай Владимирович, туһааннаах салайааччылар толору хоруйдары биэрдилэр.
“Хоту” ТХПК бэрэссэдээтэлэ, улуус дьокутаата Иван Максимов: “Өрөспүүбүлүкэ таһымыгар үлэ барар, үлэлии сатыыр дьоҥҥо көмө баар, үлэлиэхпитин эрэ наада. Ыччаппыт куоракка киирэр, тыа хаһаайыстыбатыгар, атын да тэрилтэлэргэ каадыр тиийбэт, бу эҥэр нэһилиэктэр демографическай боппуруостарын тупсарбыт Төҥүлү лиссиэйин баазата эргэрдэ, үлэ миэстэтэ сарбылла турар, онон, үөрэх тэрилтэлэрин улуустарга таһааран сайыннарыахха, элбэх этээстээх уопсай дьиэлэри тутуохха, тыа сиригэр дьону төттөрү таһаарыахха наада”, ‒ диэн этиилэри оҥордо. “Сыллата туруорсар оскуола тутуутун, биэлсэр-акушер пуунун, бөһүөлэк иһинээҕи суоллары оҥоруу боппуруостарын салгыы хаалларабыт, бүддьүөппүт кыччыы турар, онон бырайыактары оҥорор кыаҕа суохпут, буола турар балаһыанньаны өйдүүбүт, суоллары пааспардатан, сыанатын оҥортордубут, онон тырааныспар министиэристибэтин куонкуруһугар кыттар бырааптанныбыт, Эбэ Түгэҕэ сайылыкка уоту тардан кэпэрэтииби көһөрүө этибит”, ‒ диэн санааларын үллэһиннэ, туруорсар боппуруостарын чопчулаата.
Отчуоту 55 киһи кэлэн иһиттэ, бырабыыталыстыба үлэтин биһирииллэрин биллэрдилэр.
Марелла Баишева.
