Муус устар 12 күнүгэр Р.А.Бурнашов аатынан Табаҕа орто оскуолатыгар “Алаас ааттаах, дойду сурахтаах” кыраайы үөрэтээччилэр иккис ааҕыылара буолан ааста.
Кэмпириэнсийэ мусуой салайааччыта Парасковья Макарова, географ учуутал Александр Иванов олохтоох матырыйаалга олоҕуран, үөрэнээччигэ ытык өйдөбүллэри иҥэриигэ өр сыллаах чинчийэр үлэҕэ уопуттарын тарҕатыыларыттан саҕаланна. Быйылгы тэрээһин уратытынан Улуу Кыайыы 80 сылыгар аналлаах сиэксийэлэрдээҕэ буолла.
Алын кылаастарга “Дьиэ кэргэн кэриэс малын – реликвияны сырдатыы” сиэксийэҕэ 30 оҕо көхтөөхтүк кытынна. Учуутал, төрөппүт уонна оҕо айымньылаах үлэтин түмүгэ көһүннэ. Бастакы миэстэни Айаан Гоголев (2 кылаас) “Амынньыкы уус күөтэ”, иккиһи Арылхан Осипов (1 кылаас) “Хос эбэм М.М.Сосина таайын красноармейскай киниискэтэ”, үсүһү Анита Аргунова (3 кылаас) “Эбэм хомуһа” (хос эһэтэ хос эбэтигэр Амынньыкыга биһилэхтээх хомус оҥорторон бэлэхтээбит) үлэлэринэн ыллылар. Үс бастыҥ үлэлээхтэргэ РФ үөрэҕириитин туйгуна, улуус Бочуотун кинигэтигэр, СӨ педагогическай энциклопедиятыгар киллэриллибит алын кылаас учуутала, Тараҕай нэһилиэгин Бочуоттаах гражданина, кыраайы үөрэтээччи Валентина Левина аатынан истипиэндьийэ туттарылынна. Итини таһынан, бэтэрээн учууталларбыт Василиса Григорьева, Мария Романова анал бириистэринэн Аурика Кононова (1 кылаас) “Мин хос эһэм мэтээллэрэ”, Давид Саввин (4 кылаас) “Ыаҕайа“ үлэлэрин иһин биһирэннилэр.
Алаастары чинчийэр түһүмэххэ Павлик Алексеев (9 кылаас) “Куталаахтан тахсыбыт Тараҕай сис баайдарын сыдьааннара” (сал. П.Т.Макарова), Карина Григорьева (7 кылаас, Л.А.Григорьева) “Быллараат Үрэҕэ”, Ванесса Никулина “Лампа” (К.К.Петрова) үлэлэринэн биллиилээх фольклорист, кыраайы үөрэтээччи, этнограф, дьылдьыт Афанасий Порядин аатынан стипендиат үрдүк аатынан бэлиэтэннилэр.
5-7 кылаастарга Аҕа дойду Улуу сэриитин тиэмэтигэр оҥоһугу, уруһуйу көмүскээн, бастакы Василина Калачева Эллэй Сивцев «Атаарыы», иккиһи Айыына Аргунова Валериан Васильев «Сэбиэскэй Союз Дьоруойа Ф.М.Охлопков» (салайааччы Табаҕатааҕы оҕо ускуустубатын оскуолатын преподавателэ Т.А.Брызгалова), үсүһү 6 кылаас айар бөлөҕө (Т.П.Дьячковская) ылан фронтовик, алын кылаас, уруһуй учуутала Яков Зыков аатынан истипиэндьийэни тутан үөрдүлэр. Бу сиэксийэҕэ норуот маастара Марианна Маркова, учуутал Татьяна Саввина анал бириистэрин туруордулар.
Сэрии тиэмэтигэр бастакы Эрхан Васильев, Максим Владимиров (10 кылаас, П.Т.Макарова) ”Аҕа дойду Улуу сэриитин буойуннарыгар пааматынньыктар, Мэҥэ бэлиэлэр” (Тараҕай нэһилиэгин топонимическай каартатынан үлэ), иккис Мичил Бурцев (5 кылаас, Т.И.Саввина) “Сэрии ‒ мин дьиэ кэргэммэр”, үһүс миэстэ Марк Слепцов (5 кылаас, М.Д.Елисеева) “Мин хос эһэм ‒ Сталинград сэриитин кыттыылааҕа” үлэлэринэн буоланнар Аҕа дойду Улуу сэриитин кыттыылаахтара бырааттыы Николай, Прокопий, Терентий, Константин Климентовтар ааттарынан истипиэндьийэни туттулар.
Кэмпириэнсийэ кыайыылаахтара нэһилиэк дьаһалтатын аатыттан «Тараҕай нэһилиэгэ ‒ Уол Табаҕалар» дьоһун кинигэнэн наҕараадаланнылар. Павел Алексеевка РФ үөрэҕириитин ситимин Бочуоттаах үлэһитэ, “Ревнителю просвещения” мэтээллээх, СӨ үөрэҕириитин туйгуна, өр сыллаах айымньылаах үлэтинэн СӨ Педагогическай энциклопедиятыгар киллэриллибит нуучча тылын уонна литературатын учуутала Полина Брызгалова аатыттан «Кэскиллээх чинчийээччи» анал истипиэндийэ туттарылынна.
Дьүүллүүр сүбэҕэ Евгения Филиппова, Туяра Дьячковская, Алена Никанорова, Сардаана Попова, Мария Романова, Василиса Григорьева, Алексей Бурнашев, Туйаара Михайлова, Күннэй Татаринова үлэлэстилэр. Тэрээһин оскуола бибилэтиэкэрин Евгилена Владимирова бэлэмнээбит “Нэһилиэгиҥ алаастарын төһө билэҕиний?” биктэриинэнэн түмүктэннэ.
Нэһилиэкпит сирин-уотун, алаастарын күннэтэ умнуллан иһэр устуоруйаларын үөрэтиигэ, чинчийиигэ, Аҕа дойду Улуу сэриитигэр кыттыбыт, тыылга Кыайыыны уһансыбыт хаан-уруу дьоммут, биир дойдулаахтарбыт ааттарын үйэтитиигэ үлэбитин өйөөбүт бары мэссэнээттэрибитигэр, успуонсардарбытыгар дириҥ махталбытын тиэрдэбит.
Парасковья Макарова, Татьяна Саввина, тэрийээччилэр
