Оскуолабытыгар “Алаас ааттаах, дойду сурахтаах” үһүс төгүлүн ыытыллар кыраайы үөрэтээччилэр ааҕыылара быйыл нэһилиэкпитигэр Дойдуга бэриниилээх буолуу сылыгар ананан муус устар 29-30 күннэригэр тэрилиннэ.
Кэмпириэнсийэбит сыала-соруга нэһилиэкпитигэр баар мэҥэ бэлиэлэр, эргэ тутуулар күннэтэ умнуллан иһэр устуоруйаларын үөрэтии, чинчийии, дьиэ кэргэни, аймаҕы түмүү, төрөөбүт түөлбэбит, биир дойдулаахтарбыт тустарынан ытык өйдөбүллэри үөрэнээччилэргэ тиэрдии уонна оҕо ситимнээхтик кэпсиир, сахалыы ыраастык саҥарар дьоҕурун сайыннарыы буолар.
Тэрээһин ыалдьыттары билиһиннэрииттэн, “Ытык сирбит Тараҕай” видео-ролигы көрүүттэн саҕаланна. Майаттан кэлбит ыалдьыппыт, кыраайы үөрэтээччи Иннокентий Саввин Табаҕа, Тараҕай диэн топонимнары ырытар, чинчийэр үлэтин кэпсээн, истээччилэр сэҥээриилэрин ылла.
Алын кылаас үөрэнээччилэрэ “Мин дьиэ кэргэним”, ”Төрөөбүт түөлбэм уулуссалара”, “Нэһилиэк киэн туттар спортсменнара”, ”Дьоһун дьоммут Шишигиннэр”, улахан оҕолор нэһилиэкпитигэр пааматынньыктар оҥоһуллубут устуоруйаларын, эргэ тутуулары сырдатан уонна «Тараҕай нэһилиэгин бастыҥ дьоно” кинигэ сиэрийэтигэр киирбит ытык дьоммут Шишигин Спиридон Васильевич, Слепцов Егор Дмитриевич-Көлөһүн Дьөгүөр, Попов Тимофей Саввич, Климентов Петр Петрович тустарынан презентациянан, видеонан бэлэмнэнэн көмүскээтилэр, ыйытыыларга эппиэттээтилэр.
Кыраларга ааҕыы бастыҥнарынан Кононов Тургун (1 кылаас), Осипов Арылхан (2 кылаас), Гоголев Айаан (3 кылаас), Порядин Ростик (4 кылаас) буоллулар. Кинилэр РФ үөрэҕириитин туйгуна, Мэҥэ Хаҥалас улууһун Бочуотун кинигэтигэр, СӨ педагогическай энциклопедиятыгар киллэриллибит алын кылаас учуутала, Тараҕай нэһилиэгин Бочуоттаах олохтооҕо, кыраайы үөрэтээччи Левина В.И. аатынан истипиэндьийэни тутар үрдүк чиэскэ тигистилэр. Бу истипиэндьийэҕэ Валентина Ивановна кыыһа, күтүөтэ Вилза Юрий Ивановтар иккис сылын мэссэнээттээтилэр. Максимов Харысхал, Зыкова Олеся, Кононова Аурика, Гоголев Ганя, Порядина Эвелина, Владимиров Сережа, Гоголева Күннэй, Аргунова Анита ситиһиилээхтик кыттаннар Добун суругунан, минньигэс бирииһинэн бэлиэтэннилэр.
Маны таһынан педагогическай үлэ бэтэрээннэрэ Александра Фомина Пестерева Нарыйаанаҕа, Мария Романова Аргунова Дайаанаҕа, Василиса Григорьева Татаринова Милианаҕа уонна үлэ бэтэрээнэ Светлана Стручкова Билюкин Костяҕа анал бириистэрин туттардылар.
6, 7, 5 кылаас эдэр кыраайы үөрэтээччилэрин бөлөҕүнэн үлэлэригэр оскуоланы бүтэрбиттэрэ 50 сыллаах үбүлүөйдээх выпуск аатыттан Петр Климентов, 10 кылаас үөрэнээччилэрэ Павлова Надяҕа, Алексеев Павликка, Зыков Максимҥа фольклорист, кыраайы үөрэтээччи, этнограф, дьылдьыт Порядин А.С. аатынан истипиэндьийэни мэссэнээт Феврония Порядина туттардылар.
Дьүүллүүр сүбэ, тэрийээччилэр ааспыт сылларга тэҥнээтэххэ, кыттааччы ахсаана элбээбитин (уопсайа 59 кыттааччы), оҕолор сахалыы ыраастык саҥарарга кыһаллар буолбуттарын, кылаас салайааччылара, төрөппүттэр оҕолорун бэлэмнииргэ үгүстүк түбүгүрбүттэрин бэлиэтиибит.
Парасковья Макарова, Р.А. Бурнашов аатынан Табаҕа орто оскуолатын мусуойун салайааччыта.
