Дьахтар поэзията саха литературатыгар дьикти көстүү буолан тэнийэн, бэйэтэ туспа тиэмэлээх ураты тыыннаах. Төҥүлүгэ нэһилиэкпит «Айар кут» түмсүү кыттыылаахтара ‒ хомоҕой тыллаах хоһоонньута Октябрина Назарова – Уйгууна уонна СӨ Суруйааччыларын сойууһун чилиэнэ Лидия Андросова кинигэлэрин сүрэхтэниитэ буолан ааста.
Октябрина Григорьевна «Дойдум мүөттээх сыта» хоһооннорун хомуурунньугар айар кут эйгэтин абылаҥар эҥэрдээн, айбыт-туппут хоһооннорун аргыс оҥостон чугас дьонугар-сэргэтигэр, дойдутугар анаабыт айымньыларын киһи эрэ сэргээн, кэрэхсээн ааҕар. Оннук тыл күүһүнэн оҥорон, айан араас тиэмэлэргэ уобараһы уустаан-ураннаан ханнык баҕарар судургу көстүүнү кэрэтик хоһуйан суруйар.
Лидия Никитична «Сахалыы саҥалаах кэлбитим» кинигэтин, кини сүдү талаанынан ойуулаан-дьүһүннээн суруйбут хоһооннорун сөбүлээн, сөҕөн ааҕабыт, дьон-сэргэ биһирэбилин ылыан ылар. Барыта 542 хоһоон, “Эбээ үөрэҕэ” оҕолорго кэпсээннэр, остуоруйалар, кэпсээннэр, ырыа буолбут хоһоонноро, тылбаастара киирбит халыҥ кинигэтин кэлбит дьоҥҥо бэлэх уунна.
Күндү айар куттаахтарбытын «Төҥүлү нэһилиэгэ» тыа сирин түөлбэтин баһылыгын солбуйааччыта Степан Заровняев, бэтэрээннэр сэбиэттэрин бэрэссэдээтэлэ Галина Громова, олохтоох «Эйгэ» култуура киинин исписэлииһэ Афанасий Борисов истиҥник эҕэрдэлээтилэр. Кэлбит элбэх киһи бэйэлэрин истиҥ-иһирэх санааларын анаатылар. Тэрээһин сэҥээриитин ылыан ыллылар. Ылбаҕай ырыаһыт Ньургуйаана Лукина «Сахам сирэ», Дмитрий Васильев «Төрөөбүт дойду» ырыалара кэлбит дьон сүргэтин көтөхтө. Ону тэҥэ хоһоонньуттарбыт хоһоонноруттан ааҕан иһитиннэрдилэр, ырытыстыбыт.
Елена Борисова, Төҥүлү.
