«Эбээ, эһээ оскуолатыгар сахалыы үөрэтэр үһүлэр, хата, онно куораттан кэлбит нууччалыы саҥарар сиэннэрбитин биэрэрбит дуу…» ‒ диэн сурах Төхтүр иһин тэлэйэ көппүтэ. Төхтүргэ «Уйгу» түөлбэтэ улуус бэтэрээннэрин сэбиэтин чэрчитинэн, «Билиибин-көрүүбүн ыччаппар аныыбын» бырайыагынан эбээлэр, эһээлэр бэйэлэрин кыахтарынан 10 күннээх оскуолаларын сүбэлэһэн тэрийбиттэрэ.
«Уйгу» түөлбэ салайааччыта Анна Матвеевна Винокурова:
‒ Күнүс эбиэт кэннэ, үс чаас устата, куораттан, атын улуустан кэлэн сайылыы сылдьар, нууччалыы кэпсэтэр сиэннэри сахалыы тылга, үгэскэ, сиэргэ-туомҥа, айылҕалыын алтыһыыга, норуот уус-уран айымньыларын көрүҥнэрин билиһиннэриигэ уо.д.а. сатабылларга уһуйар сыаллаах-соруктаах саҕалаабыппыт онтубут сыалын ситтэ, оҕолорбут эҕэрдэ, махтал кэнсиэрдэриттэн санаабыт көтөҕүлүннэ».
Оҕо болҕомтотун тардар араас тэрээһиннэри, устуорук идэлээх, туспа айар куттаах, Ымыылаах Күндү Харысхал сүрүн көмөлөһөөччү буолан тэҥҥэ ыытыста. Манна күннэринэн үллэрэн тустаах дьону кытта кэпсэтэн сиэн оҕолору сахалыы тыыҥҥа уһуйдулар. «Төрөөбүт тыл сүмэтэ» бэсиэдэни Екатерина Винокурова, «Улууска араас сылларга бэчээттэнэн тахсыбыт айар дьоҕурдаах оҕолор айымньыларын кытта билиһиннэрии» ‒ Августина Хабарова, «Норуот тылынан уус-уран айымньыта» ‒ Марфа Аммосова, «Сахалыы остуол оонньуулара» ‒ Ася Потапова, 10 кылаас. «Эмтээх оттору хомуйуу уонна таба туһаныы» ‒ Лариса Ноговицына, «Ийэ айылҕаҕа харыстабыллаах сыһыан» ‒ Дария Степанова, балыктааһын, «Өбүгэ оонньуута» ‒ Иван Ермолаев, кылтан, сиэлтэн оҥоһуктары туохха, хайдах тутталларын туһунан Саргылаана Иванова, былыр өбүгэлэрбит туостан хайдах иһити оҥороллоругар Ирина Шергина сэргэх дьарыктары ыыттылар. Анна Холмогорова сыт таһааран атырдьах ыйын сиэрин туомун оҕо өйдүүрүн курдук быһаарда, Василий Васильевич Винокуров от үлэтин кытта билиһиннэрдэ,Ымыылаах Күндү Харысхал ынаҕы иитии туһунан кэпсээн, үрүҥ аһы астаан оҕолору күндүлээтэ.
Уон күннээх эбээлэр, эһээлэр оскуолаларын эҕэрдэ кэнсиэрин гитара доҕуһуолунан ыллыыр дьоҕурдаах, эйэҕэс эбэ Елена Находкина бэлэмнээн туруорбутун көрөөччүлэр дохсун ытыс тыаһынан махтаннылар. Елена Игнатьевна харда тылыгар тэрийээччилэргэ махтанан төрөппүттэр ааттарыттан минньигэс бэлэҕи туттарда. Бу күҥҥэ анаан оҕолор илиилэринэн тутан-хабан таһаарбыт эркин хаһыаттара сэҥээрилиннэ.
«Уйгу» түөлбэ аатыттан Анна Винокурова үөрүүлээх быһыыга-майгыга кыттыбыт бары оҕолорго туоһу суруктары туттарда. Ити кэнниттэн эйэҕэс майгылаах, үөрүнньэҥ дьиэлээх хаһаайка Лариса Ноговицына толору астаах сахалыы сандалытын тула олорон санааларын үллэһиннилэр, аны сайын хайаан да кэлиэх буолан тарҕастылар.
Августина ВЛАДИМИРОВА.
