Култуура сылыгар анаммыт, билиини-көрүүнү тургутар «ААҔЫҤ» бырайыак Төҥүлү нэһилиэгэр үһүс сүүмэрдиир оонньуута түмүктэннэ. Муус устар 14 күнүгэр Төҥүлү нэһилиэгин култууратын киинигэр 6 нэһилиэк кыттыылаах «ААХ.БИЛ.КЫАЙ» өй-санаа оонньуута үһүс төгүлүн ыытылынна.
Оонньуу ыытыллар сүрүн сыаланан-соругунан ааҕыыны көҕүлээһин, хамаандалар билиилэрин тургутуу буолар. Нэһилиэктэртэн 4-түү киһиттэн турар 6 хамаанда кытынна: “Сардаҥа” (Дьабыыл), “Дьулуур” (Тарат), “Доллу” (Тумул), “Ситим” (Балыктаах), “Тэтим” (Төҥүлү), “Дьулус” (Матта).
Оонньууну М.И.Брызгалова аатынан оҕо бибилэтиэкэтин сүрүннүүр бибилэтиэкэрэ Лилия Федорова иилээн ыытта. Хамаандалар бастакы түһүмэххэ 2-лии ыйытыылаах тургутукка эппиэттээтилэр, иккискэ — айымньы аатын, үһүс түһүмэххэ ырыа ааптарын уонна төрдүс түһүмэххэ айымньы дьоруойун таайдылар. Бэһис түһүмэх «Тобул» диэн ааттанан, манна хамаандалар барыта 7 боппуруоска эппиэттээтилэр. Боппуруостар биир эрэ тиэмэҕэ буолбакка, араас эйгэни (историяны, култуураны уо.д.а.) хабаллар. Бу оонньууну өссө интэриэһинэй уонна киэҥ таһымнаах оҥорорун бэлиэтээтилэр. Оонньуу ис хоһооно дьону умсугутар, тардар күүстээх эбит диэн кыттааччылар сыаналаатылар.
Оонньуу кэнниттэн «Сөргүтүү» кинигэ ааптара кыраайы үөрэтээччи, Төҥүлү нэһилиэгин олохтооҕо, СӨ Ытык сүбэтин чилиэнэ, «Мэҥэ аат» бэлиэ хаһаайына Андрей Андреевич Стручков саҥа тахсыбыт кинигэтин туһунан сырдатта, хас биирдии бүгүн кэлбит бибилэтиэкэрдэргэ кинигэтин бэлэх уунна.
И.М.Сосин аатынан улуустааҕы киин бибилэтиэкэ үлэһиттэрэ кыттыылаах Артур Томас Уоткин романынан «Ллойд Роуд стрит кистэлэҥэ» испэктээк көрдөрбүттэрин кэннэ уопсай түмүк таҕыста.
Түмүккэ, «Ситим» Мэҥэ нэһилиэгин хамаандата бастаан, ыам ыйын 27 күнүгэр буолар түмүктүүр оонньууга кыайыылаах хамаандалары кытта күөн көрсүөҕэ.
