Атырдьах ыйын 6 күнүгэр Мэҥэ Хаҥалас улууһугар педагогтар вакансияларыгар дьаарбаҥка ыытылынна.
Улуустааҕы үөрэх, нэһилиэнньэ социальнай көмүскэллээх буолуутун управлениелара уонна улуустааҕы нэһилиэнньэ дьарыктаах буолуутун киинэ тэрийбит дьаарбаҥкаларыгар үөрэхтэрин саҥа бүтэрбит ыччаттар, эдэр исписэлиистэр үлэ көрдөнө кэллилэр.
— Оскуолаҕа учуутал тиийбэтэ сытыы кыһалҕа. Мэҥэ Хаҥаласка нуучча тылын, математека, информатика, физика курдук сүрүн биридимиэттэргэ учууталлар тиийбэттэр, — диэн үөрэх управлениетын начаалынньыгын солбуйааччы Ирина Плотникова иһитиннэрдэ. — Былырыын маннык тэрээһини ыытан улуус оскуолаларыгар аһаҕас турбут 50 миэстэҕэ үлэһит булбуппут. Бүгүн эмиэ тэрээһин үгүс кыттыылаахтара тустаах идэлэринэн резюме хааллардылар.
«Земскэй учуутал» бырагырааманан куонкуруһу кыайан, бу күһүн Балыктаах орто оскуолатыгар нуучча тылын биридимиэтигэр эдэр исписэлиис үлэлии кэлиэхтээх.
Дьаарбаҥка түмүгүнэн педагог идэтин баһылаабыт исписэлиистэр ханнык оскуолаҕа туһааннаах вакансия баарын билистилэр, ону тэҥэ үөрэх кыһаларын салайааччылара бэйэлэрэ кэлэн үлэлэстилэр, онон интэриэс улаханын бэлиэтииллэр.
