Мэҥэ-Хаҥалас улууһун Төҥүлү нэһилиэгин биир киэн туттар дьиэ кэргэнэ Анастасия Дмитриевна, Василий Денисович Васильевтарга анаан “Сырдык ааттарынан кынаттанан“ диэн ааттаах кинилэр оҕолоро бу кэнсиэри тэрийэн иилээн-саҕалаан ыыттылар.
Бу күн элбэх киһи муһунна. Манна Төҥүлүттэн төрүттээх норуот маастардара Е.А.Баишев “Чороонноро”, Л.П.Говоров тимиртэн оҥоһуктара, Л.Н.Николаевна куукулара, А.С.Баишева сиэлтэн оҥоһуктара, “Доруобуйа” кулууп туос оҥоһуктара быыстапкаҕа турдулар. Бу кэнсиэргэ аҕыс уонча киһи кытта кэлбит “Алгыс” норуодунай ансаамбыл салайааччы М.Борисова, “Аартык” ВИА, Ю.Баишев, Ф.Шарин, П.Свинобоев, Г.Варламова салайааччылаах Төҥүлү хора,”Туйаара” вокальнай ансаамбыл, Лэкиэс, Айгылаан, Вероника Степанова, Инна Донская‒Дайаана, оҕолоро, сиэннэрэ, хос сиэннэрэ кыттыыны ыллылар.
Сыанаҕа намыын муусука тыаһаатын кытта Васильевтар оҕолоро Валентина, Альбина, Дмитрий, Любовь тахсан төрөппүттэрин туһунан ис дууһаларыттан дьоннорун хоһоонунан хоһуйан көрөөччүдэргэ тиэртилэр уонна төрөөбүт дойдуларын Төҥүлү туһунан ылбаҕай ырыа бэлэхтээтилэр.
Анастасия Дмитриевна, Василий Денисович иккиэн билсиэхтэриттэн ыла ырыаны, үҥкүүнү оройуттан туппут дьон. Василий Денисович өссө духовой оркестр тэрийбитэ кини иитиллээччитэ В.В.Захаров Майатааҕы наруот инструменнарын оркестрын салайааччыта бу кэнсиэрткэ сыалай оркестр аҕалан дьон болҕомтотун тарта, Анастасия Дмитриевна “Туйаара” ырыа ансаамбылы, аҕа саастаахтарга “Хор” тэрийбитэ олор күн бүгүҥҥү дылы ыллыы сылдьаллар. Кини өр сылларга бэтэрээннэр сэбиэттэрин бэрэсэдээтэлинэн утумнаахтык үлэлээбитэ. Эбэлээх эһэтин утумнаан сиэннэрэ “Альмагеста” ырыа ансаамбылы Аллараа Бестяхха Анастасия Павлова тэрийэн үлэлэтэ сылдьарын дьон кэрэхсии көрдө. Кинилэр сиэннэрэ, хос сиэннэрэ кэрэ эйгэҕэ чугастарын, талааннаахтарын көрдөрөн бииртэн биир сэргэх нүөмэрдэри көрдөрдүлэр.
Үҥкүүнү, ырыаны, тойугу өрө туппут дьон быһыытынан Мэҥэ Хаҥаласка аан бастакытынан саҕаламмыт култуура эстэпиэтэтин Васильевтар өр кэмҥэ нэһилиэк дьонун тардан наар инники күөҥҥэ илдьэ сылдьыбыттара. Кинилэр нэһилиэктэрин туһугар түүннэри-күнүстэри түбүгүрэллэрэ. Өрөспүүбүлүкэҕэ биир бастакытынан дьиэ кэргэн түмсүүлээҕин көрдөрөн оҕолорун кытта араас гастролларга сылдьан онтон киирбит үбү кыаммат ыалларга, инвалид оҕолорго, араас тутууларга күүс-көмө буолан холобур көрдөрбүттэрэ. Ол курдук улахан кыыстара Валентина кэргэнинээн Владимирдыын,орто кыыс Альбина дьоннорун утумнаан оҕолорун, сиэннэрин кытта сэргэх нүөмэрдэри көрдөрдүлэр, кыра кыыс Любовь, кыыһынаан чэпчэкитин үҥкүүлээн дайдылар, уоллара Дмитрий ырыа, үҥкүү, хоһоон, гитараҕа оонньоон дэгиттэр талааннааҕын көрдөрдө.
Анастасия Дмитриевна алын сүһүөх учууталынан үйэ чиэппэрэ үлэлээн бэйэтин кылаатын оҕо иитиитигэр анаабыта Кинилэр сайын аайы оҕо сынньалаҥ лааҕырын тэрийэллэрэ, оҕолору кэрэ эйгэҕэ угуйаллара, айылҕаны кытта алтыһыннараллара, бэйэни салайыыга үөрэтэллэрэ уо.д.а. Биһиги кылаас киниэхэ үөрэнэммит буоламмыт дьоллооҕунан ааҕынабыт. Кини сүрдээҕин диэн биһиэхэ кыһаллара, элбэххэ үөрэппитэ-такайбыта Василий Денисовичтыын кэрэ эйгэҕэ угуйбуттара. Учууталларбыт биһигини сатыы чугас дэриэбинэлэрбитигэр гастроллата илдьэллэрэ. Василий Денисович баянын уолаттарбыт салааскаҕа соһоллоро. Билигин санаатахха олус да кэрэ кэмнэр этилэр. Ити барыта билигин биьи олохпутугар түмсүүлээх буоларбытыгар олук буолбута. Учууталларбытыгар анаммыт бу дьоро киэһээни көрөн кинилэри ахтан-санаан ыллыбыт.
Төҥүлү нэһилиэгин баһылыга П.В.Эверстов кинилэр оҕолоругар төрөппүттэрин чиэстээн маннык үрдүк таһымнаах тэрээһини туруоран бар дьонноругар анаабыттарыгар махтанан туран эҕэрдэ сурук туттарда, чугас бииргэ алтыспыт дьонноро , үлэлээн ааспыт доҕотторо махтаннылар.
Харда тылы оҕолоро бииргэ тэрийсибит, күүс-көмө буолбут доҕотторугар махтал сурук ,өйдөбүнньүк бэлэх туттартаатылар.
Вера Владимирова
Дьокуускай
