От ыйын 1 күнүгэр Майа сэлиэнньэтигэр Бойобуой дьайыылар бэтэрээннэрин күнэ ыытылынна.
Тэрээһиҥҥэ Майа олохтоохторо, дьаһалтата, «Килбиэн» уопсастыбаннай түмсүү чилиэннэрэ, анал байыаннай дьайыыга сылдьар уолаттарбыт төрөппүттэрэ, дьиэ кэргэннэрэ кэлэн, Сыымахтан төрүттээх 2022 сыллаахха дьоруойдуу охтубут Владислав Эдуардович Тарабукин өйдөбүнньүк былакаатын таһыгар чулуу уолаттарбытыгар, дьоруойдарбытыгар сүгүрүйэн, ахтан- санаан аастылар. 2026 сылга «Кыайыы Артыга» олоххо киирдэҕинэ, хас биирдии дьоруойбут сырдык аата паамытынньыкка көмүс буукубанан үйэтитиллиэҕэ.
Бойобуой дьайыылар кыттыылаахтарын улуустааҕы «Килбиэн» түмсүүтүн салайааччыта Афанасий Николаевич Сергеев, Ытык сүбэ бэрэссэдээтэлэ, уопсастыбанньык Зиновий Иванович Игнатьев, анал байыаннай дьайыыга сылдьар уолаттарга анаан харысхал сиэккэ өрөр түмсүү салайааччыта Евдокия Петровна Семенова бу күн дириҥ суолтатын бэлиэтээн тыл эттилэр.
«Майа сэлиэнньэтэ» тыа сирин түөлбэтин баһылыгын бастакы солбуйааччы Дмитрий Александрович Игнатьев Ийэ дойдуларын көмүскүүр ытык иэстэрин толоро сылдьан кырыктаах кыргыһыыга тыыннара быстыбыт чулуу уолаттарбыт чугас дьонноругар: Куприянов Иннокентий Маркович ийэтигэр Антонина Петровна Куприяноваҕа, Никифоров Семен Викторович кэргэнигэр Элеонора Ивановнаҕа уонна ийэтигэр Анна Петровна Никифороваларга, Колосов Дмитрий Васильевич балтыгар Галина Васильевна Колосоваҕа, Федоров Федор Николаевич ийэтигэр Анна Петровна Свинобоеваҕа «Хорсун быһыытын иһин» уордьаннары туттарда. Тэрээһин кыттыылаахтара дириҥ махталларын биллэрэн, чулуу уолаттарбыт, дьоруойдарбыт сырдык ааттарыгар сүгүрүйэн туран өйдөбүнньүк былакаат таһыгар сибэкки дьөрбөтүн уурдулар, дойдубут уйгулаах олоҕун уһансыбыт эрэллээх эр бэртэрбитин өйдөөн-санаан чуумпуруу мүнүүтэтин анаатылар.
Ийэ дойдуларын көмүскүүр ытык иэстэрин толоро сылдьан кырыктаах кыргыһыыга тыыннара быстыбыт биир дойдулаахтарбыт, дойдубут бигэ тирэхтээх уйгулаах олоҕун уһансар эрэллээх уолаттарбыт күүстээх санаалара, дойдуга бэриниилэрэ биһиэхэ куруук холобур буолуо, кинилэр албан ааттара үйэлэр тухары умнуллуо суоҕа!
