Биир дойдулааҕым, саха ырыатын номоҕо буолбут Галина Никитична Шахурдина бүгүн, ыам ыйын 27 күнүгэр, Орто дойду олоҕуттан күрэммитэ 1 сыла. Кини ырыаларынан оҕо сааспыт, эдэр-эмэн кэмнэрбит аастаҕа…
Галина Никитичналыын 2020 сыллаахха, аныгы олох сиэринэн, ватсап нөҥүө билсибиппит. Ол саҕана хоһоон суруйар идэлэммитим. Тоҕо эбитэ буолла, аны хоһооннорбун ырыа гыммыт киһи диэн баҕа санаа киирэр буолбута. Ырыаттан, муусукаттан ыраах буоллаҕым дии, атын идэлээхпин, үлэлээхпин. Хас да ырыа айааччыга этэн көрдүм, ватсабынан да суруйдум, эппиэт мэлигир буолла. Арай биир сарсыарда араадьыйаҕа Галина Шахурдина ырыатын биэрдилэр… Ол күн телефонун булан, ватсапка суруйдум. Тута эппиэттии охсубута, иэйии киирдэҕинэ холонон көрүөм, кыаллыбатаҕына хомойоойоҕун диэн. Толло санаабыт киһим истиҥ эппиэтиттэн наһаа үөрбүтүм. Онтон ыла Орто дойду олоҕуттан арахсыар диэри суруйсубуппут. Бүтэһигин ыам ыйын 22 күнүгэр самаан сайынынан эҕэрдэлэспиппит…
Билигин 30-ча хоһоонноохпун, 4 хоһооммор ырыа айдым. Олоҕум атын эйгэлээх суола арылларыгар диэххэ дуу, Галина Никитична улахан оруоллаах буолбута. Кини сүбэтэ-амата олус көмөлөспүтэ уонна эрэли үөскэппитэ. Ол курдук киниттэн элбэҕи истибитим, элбэххэ үөрэммитим. Ырыа хайдах айыллыан сөбүн, иэйии диэн тугун, матыып диэн кэлэрин билбитим уонна өйдөөбүтүм…
Кырдьык даҕаны, Галина Никитична айан хаалларбыт ырыалара дьон уоһуттан түспэттэр, ырыа гынан көтүппүт хоһоонноро олус да истиҥнэр, нарыннар. Тапталы, олоҕу бу баардыы туойаллар, иитэр-үөрэтэр суолталаахтар, үтүөнү-кэрэни түстүүллэр.
2022 сыл сааһыгар Майаҕа «Салгыбаппын тапталы туойартан» диэн Галина Никитична аатынан өрөспүүбүлүкэтээҕи ырыа күрэҕэ буолан ааспыта. Күрэх буолуон 2 хонук иннинэ хоһоон суруйан бэлэхтээбитим. Бу хоһоон – Галина Никитичнаҕа махталым, кини сүдү талааныгар ытыктабылым бэлиэтэ. Галина Никитична сырдык мөссүөнэ, ырыата-тойуга өйбөр-сүрэхпэр мэлдьи тыыннаах.
Эн салгыма
Ыраас тапталы туойаҕын,
Эн мэлдьитин салгыбакка.
Эдэр ыччаты угуйаҕын
Киэһээҥҥи Балыктаахха.
Таптал имэҥин туойаҕын,
Эн куруутун салгыбакка.
Алгыс ырыатын аныыгын
Ыал буолар уоллаах кыыска.
Үйэлээх тапталы туойаҕын,
Эн өрүүтүн сылайбакка.
Дорҕоон алыбын айаҕын
Эдэр саастарын саната.
Хос ырыата:
Эн салгыма дуу, салгыма
Ыраас тапталы хоһуйартан.
Эн салгыма дуу, салгыма
Уостубат тапталы туойартан.
Анисия Яковлева-АЯ,
РФ доруобуйатын харыстабылын туйгуна, РФ үлэтин бэтэрээнэ.
Ыам ыйа, 2024 сыл.
Майа с.