Илин эҥэр улуустар биир сүрүн кыһалҕабыт Өлүөнэ Эбэбитин нөҥүө туораан Дьокуускай куоракка кэлии-барыы буолар.
Сайынын мотуоркаларынан, саас-күһүн сымнаҕас олбохтоох суудуналарынан сылдьан кэллибит. Манна сүрүннээн биир тэрилтэ үлэлиир буолан барыы-кэлии сыаната сылтан сыл үрдээн испитэ. Бу кэнники сылларга тыа сирин дьоно, кыра кыһалҕалаах киһи мээнэ барбат-кэлбэт усулуобуйатын үөскэппитэ.
Быйыл от ыйын 26 күнүттэн Сергей Владимиров салайааччылаах Мэҥэ Хаҥалас улууһун уолаттара тэрийбит «Сулус» диэн мотуоркалаах тэрилтэлэрэ үлэтин саҕалаан, айан сыаната икки төгүл аччаабыта дьону-сэргэни улаханнык үөрдүбүтэ. Билигин 5 мотуорканан айанньыттары 500 солкуобайга таһаллар, таһаҕастан төлөбүр ылбаттар, ону таһынан, 12 саастарыгар диэри оҕолору босхо тастылар. Маннык сайын устата тохтоло суох үлэлээтилэр.
Улуус дьоно-сэргэтэ түмсэн, субуотунньук күүһүнэн Аллараа Бэстээххэ күүтэр сир оҥорон, билигин Дьокуускай куоракка оҥоһуллара хаалла. Ону таһынан, «Сулус» тэрилтэ сааскы-күһүҥҥү кэмнэргэ эмиэ дьону таһарга бэлэмнэнэ сылдьар. Манна улууспут салалтата уолаттары үөрэттэрэн, онтон да атын боппуруостары быһааран, үлэ этэҥҥэ баран иһэр.
Дьоммут-сэргэбит күннээҕи кыһалҕатын быһаарар боппуруоска Мэҥэ Хаҥалас улууһун Мария Лукина салайааччылаах уопсастыбанньыктарын көҕүлээһининэн норуот хамсааһына бара турар. Илин эҥэр улуустар уопсастыбаннай түмсүүлэрэ саҕалааһыны өйөөн, аахсыйа кэнсиэрдэри улуустар кииннэригэр ыытаары бэлэмнэнэ сылдьаллар. Бу туһунан сырдатаары бүгүн, балаҕан ыйын 23 күнүгэр, «Саха» көрдөрөр-иһитиннэрэр хампаанньа устуудьуйатыгар СӨ успуордун үтүөлээх үлэһитэ Александр Попов уонна улууспут култууратын начаалынньыгын солбуйааччы Александр Кулешов ыалдьыттаатылар.
Балаҕан ыйын 25 күнүгэр Майаҕа Д.Ф.Ходулов аатынан култуура киинигэр Илин эҥэр улуустар, Дьокуускай куорат дэгиттэр талааннаахтарын, ырыаһыттарын күүһүнэн аахсыйа кэнсиэргэ барыгытын күүтэбит.
Марелла Баишева.
