Майа сэлиэнньэтигэр Самсонов аатынан уулуссаҕа турар “Сельхозтехника” тэрилтэ оройуоммут киэн туттуута. Норуокка “МТС” диэн ааттанар тэрилтэ 1934 с. тэриллэн, 90-с сылларга диэри ньиргиччи үлэлээн, нэһилиэктэри тиэхиньикэнэн, саппаас чаастарынан хааччыйан олорбута. Манна сэбиэскэй кэмҥэ элбэх араас көлүөнэ дьон бэриниилээхтик уонна таһаарыылаахтык үлэлээн ааспыттара.
Кинилэр ааттарын үйэтитэр, былыргы тимир көлүөһэлээх бастакы тыраахтар пааматынньыга турар искибиэригэр бүгүн, ыам ыйын 27 күнүгэр, Майа олохтоох дьаһалтатын көҕүлээһининэн, ытык сирбитин чөлүгэр түһэрэн ыраастыыр, сэргэхситэр субуотунньук тэрилиннэ.
Субуотунньук култуурунай чааһын Д.Ф.Ходулов аатынан култуура киинин исписэлииһэ Галина Эверстова иилээтэ-саҕалаата. Кэлбит дьоҥҥо Майа баһылыгын солбуйааччы Март Андреев, уопсастыбанньыктар Антонина Федорова, Парасковья Чичахова тэрилтэ устуоруйатын кылгастык сырдатан ахтыылары оҥордулар. Майа бэтэрээннэрин сэбиэтин салайааччы Степан Копырин, Ходоро нэһилиэгин байаныыһа Иннокентий Осипов үлэ дьонугар ырыа-тойук бэлэхтээтилэр.
Күрүө өрөмүөнүгэр Олорор дьиэ-уот хомунаалынай хаһаайыстыба үлэһиттэрэ, бөҕү хомуйууга уонна күрүө иһин-таһын кырааскалааһыҥҥа “Түмэн” уопсастыбаннай холбоһук волонтердара Евдокия Семенова, Марфа Алексеева, Розалия Терентьева, Анатолий Егоров, Валерий Романов, Ариадна Филиппова, Антонина Петрова, о.д.а. кытыннылар.
Бу курдук, сэлиэнньэбит биир кэрэ-мааны миэстэтэ күөх сайыҥҥа киэркэйдэ.
Марелла Баишева.
