Быыбар хамыыһыйата иһитиннэрэринэн, кулун тутар 23 күнүгэр буолбут «Ороссолуода нэһилиэгэ» тыа сирин түөлбэтин баһылыгын болдьоҕун иннинээҕи быыбарыгар 239 быыбардааччы кыттыыны ылбыт, бу испииһэккэ киирбит быыбардааччы уопсай ахсаанын 66,39 бырыһыаныгар тэҥ.
Быыбардыыр бүлүтүөҥҥэ 3 хандьыдаат киирбит. Барыллаан ааҕыынан, куоластааһын түмүгэ:
Афанасьев Иван Васильевич, 1989 с.т., үрдүк үөрэхтээх, «Ороссолуода нэһилиэгэ» тыа сирин түөлбэтин дьаһалтатын ыччат дьыалаларыгар уонна дьиэ кэргэн бэлиитикэтигэр исписэлииһэ, «Биир ньыгыл Арассыыйа» Бүтүн Арассыыйатааҕы политическай баартыйаттан турбут. Киниэхэ 172 быыбардааччы куолаһын биэрбит, о.э. куоластаабыт дьон 71,9 бырыһыана.
Федоров Никон Иванович, 1987 с.т., үрдүк үөрэхтээх, «Сахатранснефтегаз» ЛЭС/ЛПУМГ Илин эҥээрдээҕи учаастагын суоппара, бэйэ туруорунуу. Киниэхэ 43 киһи куоластаабыт, бу быыбардаабыт дьон 17,99 бырыһыаныгар тэҥ.
Черноградская Татьяна Лаврентьевна, 1975 с.т., үрдүк үөрэхтээх, Мэҥэ Хаҥалас улууһун бэтэринээрийэ управлениетын Ороссолуодатааҕы бэтэринээринэй пуунун сэбиэдиссэйэ, «СИЭРДЭЭХ АРАССЫЫЙА – ПАТРИОТТАР – КЫРДЬЫК ИҺИН» Социалистическай политическай баартыйаттан турбут. Киниэхэ 21 быыбардааччы куолаһын биэрбит, бу быыбардаабыт дьон 8,79 бырыһыаныгар тэҥ.
Онон Мэҥэ Хаҥалас улууһун Ороссолуода нэһилиэгин баһылыгын быыбарыгар Афанасьев Иван Васильевич кыайда.
Быыбар хаамыытын хандьыдааттартан, Саха Өрөспүүбүлүкэтин Уопсастыбаннай палаататыттан анаммыт кэтээн көрөөччүлэр хонтуруоллаатылар. Быыбар хамыыһыйатыгар быыбар сокуонун кэһии туһунан үҥсүү, сайабылыанньа киирбэтэх. Куоластааһын быыбар сокуонун бары ирдэбиллэригэр сөп түбэһиннэрэн ыытылынна.